UN DI E INSTRUMENTONAN PA HASI SINDIKALISMO FUERTE I HASTA KRESE SINDIKALISMO TA PA SINDIKATONAN USA MAS FREKUENTE I EFISIENTE E INSTRUMENTO DI KOMUNIKASHON I INFORMASHONEN NA SU MIEMBRONAN I KOMUNIDAT EN GENERAL.

Kralendijk,- Hopi biaha bo ta tende e reklamo ku miembronan no ta partisipá aktivamente ora sindikato hasi un yamada riba nan pa por ehèmpel un reunion general di miembronan òf ora organisá un evento sindikal pa miembronan.

E reklamonan ta indiká ku ta ora tin problema laboral òf ora ta trata di negoshá pa mas sèn so tur miembro ta presente. E preguntanan ku nos mester hasi ta kon i ku ki frekuensia tin komunikashon efektivo entre direktiva i e miembronan i kiko ta hasi pa stimulá e komunikashon interno. Pa por kontestá e pregunta aki por analisá kiko kier komuniká i kiko kier informá e miembresia. Un análisis ta indiká ku direktivanan por mehorá nan informashon di e aktividatnan ku e direktiva ta hasi via un komunikado regular na miembronan.

Un komunikado ku kosnan práktiko ku ta toka e trahadó riba flur di trabou. Reunion general ta un forma pa informá miembronan, pero eksperensha ta mustra ku e interes pa e tipo di reunionan aki ta hopi abou i no ta logra e meta. Na e otro un banda e sindikato por organisá eventonan sosial kaminda si tin interes i na e evento ei ta duna informashonnan relevante na komienso di  evento. E forma moderno di tegnologia a habri oportunidatnan amplio pa komunikashon efektivo entre direktiva pa miembronan pero tambe vise versa di miembronan pa direktiva i miembronan bou di otro. Tegnologianan manera whatsapp den grupo ta alkansá tur hende i ta habri e oportunidat pa kontakto personal. Informashon via shòpstewardan ta keda uno efektivo. Mas oportunidat di tegnologia moderno ta komuniká via video-call, kaminda e partisipante no mester ta fisikamente presente den un sala pero por reuní sintá den su kamber na kas. Mas medionan di komunikashon manera websait, facebook, twitter i hasta traha video ta krea oportunidatnan úniko pa e miembro sinti su mes parti di e organisashon.

Un idea ta tambe pa krea un mesa di diskushon riba temanan laboral ku meresé atenshon di sindikato. Lo bo keda asombrá kuantu ideanan kreativo i solushonnan práktiko e miembronan mes tin. Miembronan ku ta lesa e artikulo aki mes por tuma tambe inisiativa  i ofresé nan mes pa duna e direktiva un man riba un base boluntario pa fortifiká e partisipashon di miembresia den aktividatnan sindikal.

Sindikalismo den 2025 mester transformá i no por keda operá riba e mesun sistema. Un punto importantísimo ta pa direktiva siña balorá i apresiá tur ku den un forma boluntario  ta ofresé i hasi trabounan pa krea e imahen positivo di sindikalismo. Kas sindikal mester ta tambe un sitio di enkuentro sosial pa tur miembro i miembronan aspirante. Si kada miembro trese un aspirante mas serka di sindikalismo, sindikato lo krese na miembresia. E kontakto personal lo por kita tur persepshon i prehuisio negativo ku enemigunan di sindikalismo a krea atraves di añanan.  Un filósofo a bisa. Kaminda sindikatonan ta mas fuerte organisá ei nan e derechonan humano ta mas respetá. I e aktual Papa Fransisco a trese dilanti ku sindikalismo ta un forsa esenshal pa trese kambionan sosial. I kaminda esaki no t’éi of no ta bon organisá un komunidat humano, husto i desente ta imposibel bou di kapitalismo.

Pései mi kier sera e kolumna aki awe rekordando tur kompañeronan trahadó pero tambe penshonadonan ku a traha duro ku riba Dia di Labor nos ta rekordá ku esensia di sindikalismo ta alsa kalidat sosial di komunidat. Sindikalismo ta e kuna di protekshon pa esnan oprimí,eksplotá, abusá, trapá i pober .Boso presensia na e aktividat(nan) ku e sindikatonan den union ta preparando pa 1 di mei lo ta e sosten mas grandi pa tur e lidernan sigui traha ku ánimo i energia pa konservá i kaminda por mehorá boso kondishon- i sirkumstansianan laboral. Ta e  UNION ta hasi nos fuerte,

FUENTE: NÒCHI WILLEM/LIVE99FM