OPINIÓN: BONEIRU MERESÉ UN SUMINÍSTRO DI KOMBUSTIBEL KONFIABEL – NO UN GÈMBEL GUBERNAMENTÁL.

Kralendijk,- E anunsio resiente ku Reino Hulandes ta retirando su ròl di maneho den e suminístro di kombustibel na Boneiru i ta entregá e responsabilidat akí bèk na e entidat públiko di Boneiru (OLB), ta lanta preguntanan fundamental tokante bon gobernashon i responsabilidat públiko.

Entrante promé di aprel 2026, e pèrmitnan temporal pa e lokalidatnan di almanesé  kombustibel na Boneiru lo kaduká. A disidí tambe ku e terminal nobo i super-moderno planeá na Aeropuerto Suit no lo keda realisá mas. E ora sinembargo ta sigui kore, pero ainda no tin un alternativa duradero. Atrobe ta skohe pa hasi un trabou di lapi kos ku ta drecha e instalashonnan aktual. Pero hopi mas risikóso ta e senario kaminda Curoil ta plania pa kumpra e terenonan di Bopec ku a bai fayit i asina bira doño i manejadó di e instalashon nobo pa kombustibel.

Curoil ta na momentonan aki e solo importadó, distribuidó i bendedó di kombustibel riba e isla. Si e mesún entidat aki bira doño di e infrastruktura di kombustibel nobo, lo surgi un konsentrashon di poder no saludabel. Un suminístro vital i públiko manera kombustibel lo bira totalmente dependiente di ún partido komersiál. Falta di balansa i transparensia den un struktura asina no ta solamente un riesgu ekonómiko, sino tambe un irresponsabilidat den gobernashon públiko.

Pa e motibunan aki mes, e opshon anterior pa un Bonaire Brandstof Terminal (BBT) tabata asina importante.  Reino lo traha e instalashonnan moderno i ambientalmente sostenibel, eventualmente den kolaborashon ku OTB (Oil Trading Bonaire), i despues por entregá su operashon na un partido manera un Curoil, bou di supervishon i ku klaridat den un akuerdo. E separashon di ròl entre doño i manejadó tei pa protehá interes públiko, i ta duna espasio pa mas transparensia i kontrol.

E hecho ku e rumbo aki a wòrdu bandoná sin klarifikashon ni garantia, ta pone duda serio riba e direkshon ku kier bai. I ken lo supervisá e transishon kompleho i riskoso aki? OLB pa hopi aña kaba tin falta di kapasidat, un situashon ku, desde septèmber 2023, solamente a empeorá. Rapòrt di Algemene Rekenkamer i di Cft ta mustra ku e struktura di gobernashon lokal no tin e kapasidat nesesario pa manehá doshénan spesialisá i kapital intensivo manera esun di kombustibel.

Ku Reino ta sali for di e  ròl di maneho, mientras ku ainda tin 5 mion euro disponibel den Bonaire Brandstof Terminal (BBT) of loke a bin na su lugá, ta duna e impreshon ku nan a buska i haña un ‘strategia di sálida’, un huimentu di gobernashon, na lugá di yuda busak un solushon duradero. Loke ta hopi indikativo, ta ku e gezaghèber resientemente a tuma e inisiativa pa fortalesé i respetá bon gobernashon – un indikashon fuerte ku tin hopi kos ku mester keda koregí.

E komplikashonnan rondo di Selibon i e tereno di landfill na Lagún ta ilustrativo kon e e entidat públiko di Boneiru i organisashonnan ehekutivo manera Selibon a pèrdè gara riba nan tareanan. Den un entrevista, e direktor di Selibon mes a rekonosé ku e situashon a “surpasá nan forsa.”

Bon gobernashon no ta un moneda ku por usa riba kada doshé segun konveniénsia. Si e mesun norma di gobernashon no ta wòrdu apliká riba e doshé hopi mas grandi i kompliká di kombustibel, nifiká ku rekonstruí konfiansa i transparensia lo bira hopi difísil. E pregunta esensial ta: kon Boneiru por garantisá un suministro di kombustibel sigur, konfiabel i públikamente responsabel pa e próksimo dékadanan?

Esaki ta kuminsá pa evitá formashon di monopólio, garantisá kòntrol públiko riba e infrastruktura vital, i usa e fondo disponibel, manera e 5 mion euro den BBT, pa realisá e terminal di kombustibel ku mester keda den man públiko – eventualmente ku un partner tékniko – promé ku entregá e operashon na un partido privá.

Den henter e konteksto aki klaramente por ripará un dimenshon emoshonal ku ta e deseo di orguyo, autonomía i auto-determinashon, ta hungando un ròl importante. Pensamentu manera “nos mes por” òf “Hulanda mester stòp di mete den nos asuntunan’’ ta influensiá  desishonnan, di tal manera ku esaki no tur ora ta rashonal i gubernamentalmente responsabel i hasta na ínteres general di e pueblo di Boneiru. 

Boneiru meresé un suministro di kombustibel ku ta garantisá siguridat i kontinuidat – sin kore kore polítiko, sin akumulashon di riesgo i sin konsentrashon di poder. E kaminda aktual – ku un Reino ku a kita man, un entidat públiko saturá i un monopólio di kombustibel ku lo bai keda formá – por trese eksaktamente nèt e kontrario di loke ta nesesario.

Loke mester awor ta un sentido di responsabilidad komún, liderato klaro, i e kurashi pa pone interes general na promé lugá. Esei ta loke bon gobernashon realmente nifiká. Nada di wega polítiko partidista i hungamentu ku e sentido di orguyo i outo-determinashon di e pueblo a todo kosto. Sino desishon duradero pa e isla – i pa su futuro.

FUENTE: WILLEM A. CECILIA