MARAMENTU DI KABES

Kralendijk,- Djasabra 22 di mart ‘HeadwrappedbyCaroll’ den kolaborashon ku Washi Laundry Café & more, a organisá un tremendo Sip & Wrap Headwrap Workshop.

Dies dama a inskribí i partisipá den un ambiente ameno. Caroll- Ann Soliano, kende no ta deskonosí pa  mara kabes ku lensu na Boneiru, a kompartí su arte estilo di ‘HeadwrappedbyCaroll’ na tur presente.
Caroll-Ann tin mas di 10 aña ta praktiká e maramentu di lensu na kabes, headwrapnan.

Aña pasá na luna di aprel, tabata promé aña ku el a organisá un workshop, kaminda el a kompartí su obra ku otronan. E promé workshop tabata eksitoso i e aña aki tambe. Esei ta loke e partisipantenan a menshoná, momentu nan a finalista e workshop.

Por a nota ku nan a saka un kantidat di potrèt, pa inmortalisá, kon pa promé biaha nan a mara lensu riba kabes di un otro persona i tambe pa nan mes. E maramentu pa nan mes a bai poko mas difísil i ku ayudo di Caroll-Ann nan a logr’e.

Hasiendo esaki e ta involukrá impresarionan lokal, espesialmente damanan balente. E aña aki e kolaborashon a inisiá ku Madaline i Rose-Ann Werleman, e motornan tras di Washi Laundry Café & more na Rincon. Nan a trese e idea aki loke Caroll-Ann kue tene un bes.

‘HeadwrappedbyCaroll’ tin vários aktividat mas na kaminda pa e luna di aprel, pues keda pendiente na kaminda pa Dia di Rincon! Potrètnan ta ilustrá parti di e aktividat djasabra atardi na Rincon.

FUENTE: FITTIPALDI PIETERSZ/LIVE99FM