POLITIKA DI TRIBU

Kralendijk,- Luchanan kontra rasismo, diskriminashon, kolonialismo, sèksismo i kambio di klima spesial na Hulanda a yega Bonaire tambe.

Hulanda a pidi diskulpa i pordon i a pone dosshen mion euro pa proyektonan relashoná ku impakto di sklabitut riba e komunidat aktual.

Sugerensia di Roald Lapperre direktor General di Relashonnan di Reino tabata pa tur e gruponan ku ta aktivo riba tereno di pasado di sklabitut lanta un plataforma independiente ku personanan no mará na polítika ni na gobièrnu pero Kolegio Ehekutivo a disidí otro i no tin ningun plataforma.

Greenpeace a mustra riba efekto di kambio di klima na Bonaire i a bini ku un rapòrt devastador pa Bonaire, ku si no hasi nada un terser parti di Bonaire ta bai bou di awa.

Riba 20 di òktober 2022 miembronan di Tweede Kamer, Ceder i Wuite a presentá un moshon pa yega na un Caribisch deltaplan relashoná ku konsekuensianan pa e seis islanan den Karibe. Rapòrt Ed Nijpels “Nunka no ta lat” publiká riba ocho di mei 2023 a mustra ku mester bini un mesa di klima na Bonaire pero Kolegio Ehekutivo a skohe otro. Na Bonaire tin un situashon kaótiko kousá i mantené pa Kolegio Ehekutivo sostené pa Koalishon DP, M21 i frakshon Vrolijk. Tin un komishon tokante Sklabitut i unu tokante kambio di klima, pero no tin ningun partisipashon di personanan desendiente di esnan hasí katibu i ni di e abitantenan ku ta bai sufri bou di kambio di klima na e parti sùit di Bonaire. Di kon no ta konsultá ku pueblo promé ku lanta tipo di komishon asina? E kontesta ta fásil. Kolegio Ehekutivo i koalishon ta apliká polítika di tribu ku ta enserá, pone miembro di nan tribu, nan amigunan dependiente, den komishonnan pa garantisá nan poder i ekskluí esnan ku no ta pensa manera nan. Te awe no tin ningun klase di informashon ni ki ta tarea di e komishonnan te pa riska papia di partisipashon di pueblo. E luna aki ta nèt 161 aña ku Presidente Abraham Lincoln a dediká su spich na e sementerio nashonal na Gettysburg. Na final el a bisa “Pa gobernashon di pueblo, pa medio di pueblo i pa pueblo lo no disparsé di mundu”. Na Bonaire gobernashon ta pa miembronan di e tribu di Kolegio Ehekutivo i koalishon i no pa medio di pueblo ni pa pueblo.Ta Tribu ta manda i pueblo mester obedesé. Despues ku miembronan di tribu kaba rabia, zundra bira ònsportif nan lesa e masterscriptie “The Coliniality of Climate Justice” di Javina Bijl 

FUENTE: ARTHUR SEALY/LIVE99FM