KARTA DI  FRAKSHON M21 PA KOLEGIO EHEKUTIVO

Kralendijk,- Konseho Insular a risibí un karta di e koperativa Piskabon ku un petishon urgente pa atendé nan preokupashon pa loke ta e supsidio ku e koperativa lo risibí pa e aña di presupuesto 2025.

Mi ta konsiderá e petishon aki komo un opheshon di parti di e organisashon kontra un desishon di

Kolegio Ehekutivo i komo tal un apelashon riba Konseho Insular. Si Kolegio Ehekutivo ta kompartí e pensamentu aki, antó e ora ei e lo mester bira un punto di agènda ku nos komo Konseho Insular tin ku bai trata.

Na e otro un banda M21 ta usa e oportunidat aki pa via su derecho di hasi pregunta akumulá e promé dato- i reakshonnan di parti di Kolegio Ehekutivo riba e preokupashonnan ekspresá den e karta.

Mi ta kuminsá na sita punto 22 di nos programa di gobernashon ku ta bisa: “ Desaroyá i stimulá sektor di agrikultura, krio di bestia i di peskeria di moda ku nos por produsí un gran parti di nos propio kuminda”.

Esaki den kuadro di nos pensamentu ku nos pueblo mester bira outosufisiente i ménos dependiente di su kuminda di eksterior. E ta tambe un maneho dirigí pa nos por manehá nos kosto di bida i asina mantené nos forsa di kompra na nivel akseptabel.

E ta un di e instru­men­to­nan pa realisá punto 1 di nos programa di gobernashon, esta ku kada habi­tan­te lo por sobra 30% den su pòtmòni tur fin di luna.

Sekretario di estado pa asuntunan di Reino a deklará den e debate di presupuesto djárason 23 di òktober último ku lo pone 24 mion euro disponibel pa produkshon di kuminda pa e 6 islanan den Caribe.

Den e rapòrt di “verdienmodel” tin pará i mi ta sita: “Desaroyá propio produkshon di kuminda ku invershonnan públiko i maneho koherente. Boneiru ta importá kasi tur su kuminda loke ta pusha kosto di bida bai ariba i ta hasi nos ekono­mia sensibel pa subida di preisnan eksterno i akontesimentunan.

Desaroyo di un sektor agrario i di peska ta esensial pa outoprovidensia, pa baha gastunan di kuminda i mengua nos vulnerabilidat. Invershonnan públiko den infra­struk­tura di agrikultura i peskeria spesífiko, logístika i puntonan di benta, igual ku supsidionan dirigí i bentahanan di impuesto pa produktornan lokal ta nesesa­rio pa desaroyá e sektornan aki.”

Pues no por tin duda ku peskeria komo un di nos industrianan ekonómiko mas bieu i tradishonal ta di gran importansia pa nos koalishon.

I M21 ta kere ku nos tin e potensial pa pone un fundeshi sólido pa e sektor aki bai na un nivel mas profeshonal. I ku piskadónan a uni den un koperativa pa asina den un forma solida­rio traha huntu riba puntonan ku ta di interes komun i kolektivo ta di aploudí i ku di parti di gobièrnu mester yuda desaroyá i stimulá. I ta na nos den konseho Insular pa pone e kuadro pa esaki.

Hasiendo uso di artíkulo  45 di nos reglamentu di órden mi ta hasi e siguiente pre­gun­ta­nan na Kolegio Ehekutivo.

1. Kolegio ehekutivo ta rekonosé  ku desaroyo di produsí mas tantu  di nos propio kuminda ta kontribuí enorme den outoprovidensia, baha gastunan di kuminda i mengua nos vulnerabilidat pa faktornan eksterno?
2. Kolegio Ehekutivo ta rekonosé Piskabon komo e partner mas importante pa tin relashon kuné riba e sektor di peskeria i ku den esaki mester stimulá un bon koperashon entre e departamento di LVV na R&O ku Piskabon?
3. Kolegio Ehekutivo a stipulá pa su mes kua ta e tareanan (primario i sekundario) ku ta responsabilidat di gobièrnu i ku e ke kompartí i/o delegá na Piskabon? Si e kontesta ta “sí’; splika nos esakinan.
4. Kolegio Ehekutivo ta konsiente ku delegá tareanan ta enserá implísitamente traspasá fondonan nesesario pa esaki por keda ehekutá na un manera res­pon­sa­bel?
5. Kolegio por splika Raad kiko a hasi ku e fondonan di e oumento di “opcenten” riba vastgoedbelasting ku tabata destiná pa entre otro e sektor di peskeria?
6. Kolegio por splika Raad kuantu fondo a pone disponibel pa 2025 i struktural­men­te pa añanan despues pa por kumpli ku punto 22 di e programa di gobernashon aktual?
7. Gobièrnu ta di akuerdo ku mester hasi invershonnan públiko den infrastruktu­ra di peskeria? Amplia riba e kontesta.
8. Ki plannan konkreto gobièrnu tin pa ku pone fasilidatnan di infrastruktura físi­ko pa piskadónan na òrdu?
9. Na kua instansia gobièrnu ke enkargá e maneho di e fasilidatnan aki despues ku gobièrnu a pone tur na òrdu?
10. Ta eksistí un reda sosial pa e sektor di piskadónan profeshonal?
11. Kon Gobièrnu por yuda/intermediá pa e sektor di peskeria tambe tin akseso na e fondonan ku Sekretario di Estado a menshoná, pero tambe na fondonan Oropeo pa asina krea un kaminda pa yega na optimalisá outoprovidensia di nos komunidat pa loke ta produkshon di kuminda?
12. Gobièrnu ta di akuerdo ku mester pone fondonan pa supsidio dirigí pa por desaroyá e sektor aki?
13. Gobièrnu ta dispuesto di re-evaluá huntu ku Piskabon e presupuesto pa 2025 di moda ku esaki ta di tal nivel ku e por kubri e nesesidatnan i proyektonan menshoná den e presupuesto 2025?

Mi ta konfia di risibí e kontestanan riba e preguntanan aki verbal den e próksimo reu­nion públiko.