AKSIDENTÉ ENTRE MOTORCROSSER I PIKÒP RIBA KRUSADA KAYA PAPA CORNES I KAYA KORONA

Kralendijk, – Algun ratu pasa sentral di polis a keda notifiká di un aksidenté ku a tuma lugá riba krusada Kaya Papa Cornes i Kaya Korona.

Na yegada di patruyá na e sitio a bin topa ku un pikòp ku aparentemente mester a bai lora subi Kaya Papa Cornes sin duna preferensia na e motorcrosser ku tabata direkshon nòrt.

Mesora a pidi sentral pa dirigí e personal di ambulans pa e sitio ku na yegada mesora paramedikonan a duna e víktima e promé asistensia pa despues transportá e víktima pa poliklinika pa tratamentu médiko avansá.

E personal di CRS a presentá na e sitio pa registrá i atendé ku e aksidenté, mientras ku e motorcrosser a keda konfiská.