Redakshon
Kralendijk, – Esaki ta nifiká ku e sueldo minimo a bira Usd. 10.09 pa ora pa lei. Ku otro palabra tur dunadó di trabou mester mantené nan mes na e lei aki….punto. Sindikalismo kier bolbe hasi un yamada serio na tur dunadó di trabou ku si e oumento aki lo por a kousa problema finansiero den nan empresa pa nan tuma kontakto ku Kamara di Komersio i/o Ministerio di Asuntunan Sosial i di trabou i trese pruebanan atraves di nan kuentanan anual di e problema ku nan por a haña nan aden. Asina por buska solushon pa e problema. No ta korekto si ku no ta paga e trahadó na tempu òf ta paga e trahadó mitar di su salario i e otro mitar te dia 10 di e otro luna. No lubidá ku un aktitut asina ta pone e trahadó tambe den situashonnan masha ferfelo mes, ya ku e no por kumpli ku su obligashonnan di tur luna ku tur e konsekuensianan ku esaki ta trese kuné. Si abo komo trahadó hañabo den un situashon asina, tuma kontakto mesora ku e departamentu di asuntunan sosial i buska yudansa. En todo kaso bo mester informá bo dunadó di trabou por eskrito riba e fayo aki i supliké pa korigí e situashon. Si bo ta afiliá na un sindikato, informá mesora bo shopsteward ku na su turno mester informá e sindikato pa esaki por duna e asistensia nesesario.
Ku e oumento di sueldo minimo aki i kuné e oumentonan ku a tuma lugá den diferente empresa den e otro kategorianan di salario, por bisa ku a sera un episodio largu ku sindikalismo a lucha pa drecha e forsa di kompra aki na Boneiru. Esaki ta un korekshon di mas ku 14 aña ku preisnan a subi sin ku e entradanan a kana pareu i ku a kousa ku 40% di nos poblashon a kai den pobresa i ku e pobresa aki a afektá esnan ku tabata traha hopi duru, ya ku nan mester a traha dos òf mas trabou pareu pa asina logra kumpli ku nan obligashonnan di tur luna i ku tur konsekuensianan negativo ku esaki a trese kuné. Gobièrnu tantu lokal komo nashonal i sektor empresarial a siña un lès for di esaki i esei ta ku mester hasi tur esfuerso posibel pa mantené e forsa di kompra na un nivel akseptabel den nos komunidat i tambe pa repartí na un forma mas hustu e entradanan ku e komunidat ta generá. I den e ehersisio aki sigur gobièrnu nashonal na Den Haag a kompañá e oumento ku diferente otro medida pa por kontené e gastunan. Asina por menshoná ku te ku fin di 2024 e suspsidio di 1300 dòlar pa paga koriente pa trahadónan te na un siero entrada lo keda na vigor. E supsidio pa tarifa fiho di awa i koriente i e rebaho pa uso di internet tambe ta medida ku a i ta yuda kontené e gastunan.
E oumento di kompensashon pa yu i e aporte den gastunan di akohida pa muchanan tambe ta parti di e medidanan ku a tuma i ku ta yuda trese balansa entre entrada i gastunan, pues ku ta stabilisá e forsa di kompra. Pregunta si ta ku nos ta bai yega un aña ku a tuma e desishon di mehorá entradanan, kua ta e medidanan ku nos gobièrnu lokal a tuma i ku ta den su aria di responsabilidat pa kontribuí e tambe na mantené e forsa di kompra stabil. Nos a tende si di oumento di kompensashon pa miembronan di konseho insular, nos a tende si di gastunan grandi na biahe, nos a tende si di fondonan ku aparentemente a ser mal gastá na proyektonan di infrastruktura, manera rotònde, renobashon di ambachtschool bieu, kompra di Fontein, areglo di senioren, ets. pero medidanan ku ta toka direktamente e pueblo te ainda no ta visibel. Nos ta spera ku den e presupuesto pa 2025 i despues e maneho “nobo” lo keda stipulá i e vishon i e direkshon ku nos kier bai lo ta kla pa henter nos komunidat. Pa e klase trahadó en todo kaso nos lo kier mira e desaroyo i kresemento duradero di nos ekonomia kual lo garantisá kuponan di trabou eksistente i krea kuponan nobo i ku lo aportá na hisa nivel di kalidat di bida di nos hendenan i ku lo krea un komunidat husto pa UN i TUR.
FUENTE: NORWIN WILLEM/LIFE99FM
GIPHY App Key not set. Please check settings