SINDIKALISMO TA REPRESENTÁ INTERESNAN DI E TRAHADÓNAN DEN UN KOMPANIA.

Kralendijk, – Interesnan di e trahadónan ta opviamente trabou, esta trabou konsistente i kontinuo i tambe kondishonnan i sirkumstansianan laboral husto, saludabel i sigur. Tur esakinan ta keda akordá den un Kontrato Kolektivo, esta un CAO entre gerensia di e kompania i direktiva di e sindikato ku un balides generalmente di tres aña. Durante e tres añanan ei e partidonan ta mantené nan mes na loke a keda akordá i asina ta garantisá pas i trankilidat laboral riba flur di trabou. Pa tin trabou konsistente i kontinuo ta di suma importansia ku e maneho di e kompania ta finansieramente-ekonómikamente salú. E maneho aki ta ser supervisá dor di hunta di komisario i anualmente ta pone e resultadonan di e kompania den un kuenta anual pa asina por analisá e desaroyo den e kompania i si ta nesesario ta tuma medida na tempu pa korigí e maneho, adaptá e maneho ku e solo meta ku e kompania ta krea fondonan pa e por operá normal i ta krea reservanan pa re-invertí den e kompania i asina mantené funshonamentu di e kompania mas optimal posibel.

Ounke no ta responsabilidat di sindikalismo pa loke ta e  maneho di e kompania, sindikalismo tin tur interes pa vigilá si ku e kompania ta drei bon i asina garantisá konsistensia i kontinuidat di e kompania i ku ta kumpli ku tur e kondishonan laboral akordá den e CAO. I sindikalismo ta konsiderá komo su deber di bati bèl ora e tin informashon ku trabou di e trahadónan, pero tambe kumplimentu kabal di e CAO ta na peliger pa mal maneho den e kompania.

Sindikalismo i Selibon. Basta informashon ta saliendo e dianan aki relashoná ku kambio di gerensia di Selibon. Hasta nos por a skucha komentario di un diputado, den kual esaki a duna di konosé opinion di nan komo e úniko akshonista, esta e úniko doño di e Bonaire Holding Maatschappij, kon nan lo a deseá di mira e konstelashon di e gerensia temporal. Laga nos ta bon kla den e kaso aki, sindikalismo a sostené trahadónan totalmente den nan lucha ku nan a hiba dia 3 di aprel 2023 i ku a dura 4 dia. I laga nos tur keda kòrda ku e lucha ei no tabata pa mas sèn, ya ku sindikato AFBW a logra un bon CAO ku hopi adelanto finansiero pa e trahadónan i resientemente a bolbe logra ku a oumentá e salario di tur e trahadónan den e kompania. E wèlga su base tabata mas bien riba e maneho den Selibon, mui en espeshal e trato ku e trahadónan tabata risibí i e ekpio i material insegur ku e trahadónan mester a traha kune.  AFBW huntu ku e trahadónan no solamente a trese e preokupashonnan aki dilanti ku boka, pero a dokumentá esakinan hopi konkreto.

Pues gerensia di Selibon, hunta di komisario di Selibon akshonista di Selibon, esta Bonaire Holding, gobièrnu di Boneiru komo doño di Holding i Konseho Insular di Boneiru ta bon na altura di e posishon di e trahadónan representá pa nan sindikato. Bonaire Holding riba proposishon di hunta di komisario a skohe pa temporalmente nombra un direktor interino i no un direktor permanente. Ta nan eskoho i ta nan ta responsabel pa esaki. Sindikalismo ta spera sinseramente ku un di e promé akshonnan di e gerente nobo i interino lo ta di invitá e sindikato pa sera konosí i mesora atendé ku tur e datonan konkreto ku e sindikato a pone den e dokumentashon di nan posishon i huntu ku e trahadónan traha ku tur sinseridat i den tur transparensha na un Selibon nobo ku por kumpli ku e eksigensianan di rekohé i prosesá sushi riba nos isla den un forma finansieramente i ekonómikamente rendabel i ku den e proseso aki lo sabi di balorá e forsa humano di e kompania, ku ta e trahadónan. Ta nan ta kurason di e kompania.

Mester trata nan i duna nan e balor komo tal….punto. Pues di sumamente importansia lo bai ta e maneho di rekurso humano, pero alabes tambe ta importantisimo e ekipo i material ku e kompania mester i ku ta garantisá efisiensia i seguridat di e trahadónan den ehersementu di nan trabou. I pa por stipulá un maneho pa un Selibon nobo mester midi loke tin, mester midi na unda e kompania ta awe na 2024 den tur su aspekto pa huntu determiná na unda kier hiba e kompania den e próksimo tempu. I den esaki kada órgano di e kompania tin ku karga nan responsabilidat manera e statuto i e prinsipionan di coporate governance ta stipulá.

FUENTE: USIBO/LIVE99FM