E ORA A YEGA. NOS NO POR NI NOS NO TA  KEDA KAS. NOS TA BAI PA 36 ORA, PA NOS DIGNIDAT I PA NOS FUTURO.

Kralendijk, – Boneiru ta drei riba forsa di nos komo trahadónan. Riba nos mannan ku ta kuida, ku ta konstrui, ku ta hasi limpi, ku ta duna lès, ku ta guia, ku ta protehá, ku ta sirbi den horeca, ku ta kosechá salu, ku ta drecha nos kayanan i kamindanan, ku ta traha kas pa pueblo, ku ta bende den pakus i supermerkadonan. Boneiru ta drei riba tur hende ku dia aden dia afó ta lanta mainta pa produsí. Hopi biaha pa años bou di sirkumstansianan ku no ta kuadra mas ku e gastunan real di bida.

P’esei e manifestashon di djasabra awor pa 4’or di atardi den kurá di AFBW no ta un reunion komun i koriente. E ta un momento históriko di kambio kaminda trahadónan na Boneiru lo laga mira, skucha i sinti ku ta basta. E lo ta un momento ku huntu nos lo bisa den un bos ku 36 ora di trabou pa siman no ta un luho ni fabor, sino un paso nesesario den direkshon di un bida salú, un bida di kalidat i di dignidat.

Na tur trahadó den kuido akai na Boneiru, esta boso di Mariadal, boso di Zorgwerkgroep, di Stichting Projekt, di MHC i di PCC, boso ta karga Boneiru riba boso skoudernan. Boso ta traha di dia, anochi den fin di siman i riba dianan di fiesta i finnan di siman. Boso ta karga ku doló di otronan hopi biaha a kosto di boso propio salú. 36 ora di trabou no ta un regalo – e ta un rekonosementu di boso komo ser humano, un di e tres R-nan ku ta forma e prinsipionan sindikal..

Na tur trahadó di kompanianan afiliá na AFBW, boso sa kon pisá e peso di trabou ta. Boso sa kon e balansa entre trabou i bida privá i bida familiar poko poko ta sali for di man ku su konsekuensia pa e relashonnan familiar. Tiki tempu pa bida sosial ku kasá i yunan. Esaki ta e momento pa nos laga mira ku trahadónan ta uní den e lucha husto aki.

Na tur trahadó di Boneiru en general, Si nos no uni, nada lo kambia. Si nos no ta visibel djasabra awor den UNION, e peso di trabou lo sigui oumentá. Si nos no tene man di otro i yega serka otro e futuro di nos yunan lo ta igual ku esun di nos. Traha duro, tiki siguransa. Pues bin ku bo yunan tambe. Ta pa nan futuro nos a lucha awe.

Yega boso tur na e manifestashon. Para banda di otro ku man tené. Laga mira boso presensia i laga tende boso bos. Laga konta kabes, pasobra maneho no ta kambia ku palabra so – e ta kambia ku hendenan ku ta lanta para pa nan derecho. Na 1889 ela kambia di 80 pa 40 ora siman pasobra trahadónan a lanta para den unión. Hasta nan a sakrifiká ku nan libertat i algun di nan ku nan bida. Na 1997 na Hulanda ela kambia di 40 ora pa 36 ora pa siman pasobra trahadónan a drenta den akshon pisá. Na 2026 e ta bai kambia di 40 pa 36 ora pa siman pasobra e klase trahadó na Boneiru, Saba i Statia ta bai lanta para den un manifestashon públiko pa e mensahe yega den un bos na tur konserní. Nos komo trahadó di Boneiru, Saba i Statia ta bai kambia historia. E señal lo ta uno pasífiko pero ku determinashon di lo no bèk.

E manifestashon ta totalmente hustifiká pasobra E ta un palabrashon entre sindikato i e dunadónan di trabou den kuido riba e islanan Boneiru, Saba i Statia, E ta un rekomendashon di komishon Goedgedrag, pero tambe e ta un invershon den salú di trahadónan; e ta un kontesta riba e sobrepeso di trabou struktural ku ta kousa burn-outs, malesa, ousensia di trabou i hasta retiro for di trabou; e ta un paso direkshon di un modelo di traha moderno i humano ku ta kuadra ku e tempu di nos na Boneiru; e ta un señal ku trahadónan ya no ta un opheto ku bo por  rèk manera bo ke den nos ekonomia. Nos ta para fuerte riba e tres R-nan, esta Rèspèt, Rekonosementu i Rekompensa husto.

Nos ta meresé un bida ku nos por paga nos gastunan — i un trabou ku por sostené esaki. Esaki ta e momento pa nos bira visibel, laga tende nos bos i para den Union aki na Boneiru i na Saba i Statia. Komo sindikato nos a bai dilanti i duna nos parti. Awor nos kier i mester konta ku boso pa duna boso parti. Kada un di boso tin e tarea e siman aki pa enkurashá tur hende ku bo topa pa invitá nan pa t’ei djasabra awor 15 di augustes den kurá di AFBW pa 4’or di atardi. Nos ta konta riba bosonan.. Ban huntu. Ban drecha historia.