FUNDASHON YDK BONAIRE TA OFISIALMENTE UN REALIDAT

Kralendijk,- Djaweps, 16 di yüli 2026, a firma e akte di establesementu di Fundashon YDK Bonaire dilanti di notario.

Ku esaki, Fundashon YDK Bonaire a keda ofisialmente establesé na Boneiru. Fundashon YDK Bonaire tin komo meta prinsipal promové i defendé interesnan di Kurasouleñonan / yunan di Kòrsou bibá na Boneiru, i funshoná komo un punto di sosten pa e grupo metá.

Historia E movementu akí tin su orígen na aña 2023, ora ku a nase e vishon di Señora Miriela Short pa lanta un fundashon na Boneiru. E propósito tabata pa no solamente organisá e aktividatnan di Dia di Himno i Bandera di Kòrsou na Boneiru, sino tambe pa desaroyá un plataforma duradero ku ta duna un aporte real na e komunidat.

Pa hasi e meta akí un realidat, Señora Short a aserká Señor Jonathan de Wind, kende a hasi e konekshon nesesario ku Señor Jefferson Rosalia.

Huntu nan a sigui duna forsa na e idea i a logra unifiká un tim dediká di shete (7) persona, formando asina e motor di e organisashon.

Na aprel 2024, e grupo akí a keda ofisialmente nombrá komo un komishon di trabou. Danki na nan determinashon i esfuerso, dia 2 di yüli 2024 a marka e história ku un realisashon eksitoso di e selebrashon di “Dia di Himno i Bandera di Kòrsou” na Boneiru.

E trayektoria akí di unifikashon i persistensia a sirbi komo e fundeshi sólido ku awe a resultá den e establesimentu ofisial di e fundashon.

Miembronan fundadó Fundashon YDK Bonaire a ser fundá pa:

• Miriela Short

• Rashid Lie Atjam

• Mazarella Jansen

E miembronan fundadó ta forma e Direktiva di Fundashon YDK Bonaire.

Nan lo guia e organisashon durante su fase inisial i traha pa realisá e metanan stipulá den e statuto.

Metanan di Fundashon YDK Bonaire Fundashon YDK Bonaire tin komo meta:

• Promové i defendé interesnan di Kurasoleñonan / yunan di Kòrsou bibá na Boneiru;

• Funshoná komo punto di sosten, fuente di informashon i partner di instansianan gubernamental den asuntunan relashoná ku e grupo metá;

• Organisá aktividatnan kultural, sosial, edukativo i informativo pa mucha, hóbennan i adultonan;

• Promové ekspertisio, empoderamentu i desaroyo personal di e grupo metá;

• Informá, konsehá, motivá, stimulá i guia e grupo metá;

• Stimulá partisipashon aktivo den komunidat i kontribuí na un sosiedat inklusivo;

• Organisá charla, workshop, entrenamentu, kurso i proyekto pa benefisio di e grupo metá;

• Atraé fondo, subsidio i donashon pa sostené e aktividatnan i proyektonan di e fundashon.

Kolaborashon ku otro organisashon Fundashon YDK Bonaire ta habrí pa kolaborá ku otro fundashon, organisashon i instansia na Boneiru.

E fundashon ta kere den union, koperashon i interkambio di konosementu pa fortalesé komunidat i krea mas oportunidat pa tur hende.

Den un futuro serkano, e Hunta di Direktiva tin planiá pa presentá e fundashon na Kolegio Ehekutivo di Entidat Públiko Boneiru i na Gobièrnu di Kòrsou.

Durante e enkuentronan aki, e Hunta di Direktiva lo duna splikashon tokante e metanan, plannan i proyektonan di Fundashon YDK Bonaire.

Tambe lo eksplorá e diferente posibilidatnan pa koperashon i kolaborashon. Fundashon YDK Bonaire ta kuminsá e etapa nobo aki ku entusiasmo, responsabilidat i un kompromiso firme pa sirbi komunidat.

 Nos lema: No lubidá nos rais.

FUENTE: FUNDASHON YDK BONAIRE/LIVE99FM