BHRO TA KONDENÁ BONAIRE.NU I TA HASI YAMADA PA PERIODISMO RESPONSABEL 

Kralendijk,- Bonaire Human Rights Organization (BHRO) ta kondená kategorikamente e artíkulo publiká dia 7 di yüli 2026 dor di Bonaire.nu i skirbí dor di reportero Hans Hofstra, ku ta desviá atenshon públiko for di e konklushonnan di Komité di Nashonan Uní pa Derechonan Ekonómiko, Sosial i Kultural (CESCR) pa medio di spekulashon i insinuashonan sin base tokante Sr. James Finies.

James Finies, fundador di BHRO, ta akreditá na Nashonan Uní, ta Miembro Asosiá di CARICOM Reparations Commission i miembro di COPPPAL. BHRO ta un organisashon di derechonan humano rekonosí internashonalmente ku a partisipá den proseso di Nashonan Uní na New York, Geneva i Vienna, trahando ku mekanismonan di derechonan humano pa medio di sumishonnan skirbí, intervenshonan oral i defensa di e derechonan di e pueblo di Boneiru.

For di 2016 te 2026, James Finies a partisipá den aktividatnan di Nashonan Uní na Geneva I New York komo representante independiente di sosiedat sivil, defendiendo e derechonan di e pueblo di Boneiru. Entre 2024 i 2026, el a hasi mas ku 50 intervenshon dilanti di mekanismonan di Nashonan Uní, inkluyendo Human Rights Council, ECOSOC, Permanent Forum on Indigenous Issues, Permanent Forum on People of African Descent, i Mekanismonan I Gruponan di Ekspertonan I mas. Tur e intervenshonan aki ta parti di e rekord públiko ofisial i ta disponibel den e arkivonan di Nashonan Uní, inkluyendo UN Web TV.

Ademas, resientemente Sr. Finies a wordu elegi komo Presidente di Komité di Deskolonisashon di COPPPAL, reflehando e rekonosementu internashonal di su trabou di hopi aña riba deskolonisashon i derechonan humano.

E berdadero notisia ta ku Komité di Nashonan Uní pa Derechonan Ekonómiko, Sosial i Kultural a bolbe hasi yamada riba Reino Hulandes pa tuma medida urgente pa atendé e desigualdatnan persistente ku ta afektá Boneiru, inkluyendo pobresa, vivienda, kuido di salú, protekshon sosial, outodeterminashon, edukashon, kultura, e haltu kosto di bida i e partisipashon pleno i efektivo di e pueblo den desishonnan tokante nan futuro.

Na lugá di enfoká riba e problema serio ku ta afektá Boneiru i e konklushonnan di mekanismonan di derechonan humano di Nashonan Uní, e korant digital aki a preferá pone duda riba e partisipashon di Sr. James Finies den aktividatnan di Nashonan Uní. Sin embargo, BHRO nunka no a risibí niun pregunta di Bonaire.nu, p’esei no ta apropia pa insinuá ku tabatin falta di kontesta òf stimulá spekulashon tokante Finies su kredibilidat.

Ademas, miéntras ku korantnan i medionan lokal Boneriano i Karibeño regularmente ta publiká komunikadonan di prensa di James Finies i BHRO, medionan na idioma Hulandes i Ingles riba Boneiru, inkluyendo Bonaire.nu i The Bonaire Reporter, sistemátikamente a nenga di publiká nan. Ora nan a publiká nos komunikadonan, e tekstonan a wordu editá òf reeskiribí, kambiando e mensahe i signifikashon original na lugá di presentá e notisia di un manera husto i korekto.

E artíkulo tambe a pone pregunta tokante e finansiamentu di e trabou i lucha internashonal di Sr. Finies den defensa di e pueblo Boneriano. BHRO ta konfirmá ku e a entregá su raportnan finansiero anual na outoridatnan fiskal pa e periodo 2016–2025. E raportnan ta identifiká e fuentenan di finansiamentu, inkluyendo donashonan di Parke Libertat, di Famia Bissessar, di Famia Finies, i numeroso donashonan privá di simpatisantenan riba Boneiru inkluyendo miembronan di komunidat Hulandes.

Durante 2026, Plataforma Pueblo Boneriano (We the People of Bonaire Platform) huntu ku BHRO lo organisá un ekshibishon públiko ku dokumentonan ofisial di Nashonan Uní tokante mas di un dekada di partisipashon di James Finies i BHRO (2016–2026). BHRO tambe lo pone disponibel pa medionan di komunikashon un fact sheet ku referensianan ofisial i enlacenan di UN Web TV, pa periodista i públiko por sigui e trabou di manera independiente.

Finalmente, BHRO ta hasi un yamada na Bonaire.nu i su reportero Hans Hofstra pa respetá e prinsipionan di etika di periodismo, sigurando ku publikashonnan ta basá riba hechonan verifiká, hustisia, ekilibrio i diligensia profesional. E pueblo di Boneiru meresé un periodismo ku ta informá e komunidat tokante desaroyonan internashonal importante riba derechonan humano ku ta afektá e isla. 

FUENTE: BONAIRE HUMAN RIGHTS ORGANIZATION