KONFIANSA DEN POLITIKA

Kralendijk,- Tin loke nos ta yama moral ku no ta nada mas ku komportashon deseabel i kiko no ta aseptabel.

Loke ta pasando aktualmente den polítika na Bonaire no ta deseabel komo ku tin wega shushi ku ta peligrá nos derecho di estado demokrátiko.

E peliger ta okashoná pa M21 ku ta burlando e regla di konfiansa i e kos di mas tristu ta ku señor Weber ku parse di tin bon reputashon ta drenta den e fechoria aki pa daña su nòmber.

Wolbes no konosé regla di konfiansa. Ta un apsurdes di marka mayor pa pone bo posishon na disposishon di Konseho Insular i pidi konfiansa di Konseho Insular.

E fli aki no ta subi. Ningun Konsehal no por aseptá e triki di señor Weber i M21 ku nan konseheronan ku ta nèt e parti di moral ku no ta aseptabel, pero pa poder i ganashi lo tin di benta moral un banda.

Señor Weber entregá bo retiru komo diputado i pa bo bon nòmber retirá di M21 i bai kas pa motibu ku no por tin ningun moshon den Konseho insular pa pidi konfiansa den bo persona.

Bo ta konfiando robes señor Weber. Moshon di deskonfiansa ta e regla pa manda un diputado kas. E trampa pa tur hende kai aden ta ku señor Weber no tin konfiansa den Abraham I Silberie i no ke bai kas pero ke fòrsa otro pa skapa su kurpa i tira falta riba e otro diputadonan.

Awèl mas diabóliko, antidemokrátiko, sin ningun klase di étika i eskrúpolo no tin. Si aseptá un moshon kontra regla ta nifiká ku a sostené un moshon di deskonfiansa kontra diputadonan Abraham i Silberie.

Mi ta pidi M21 pa stòp ku e kosnan di mala fe aki. Mi ta súplika gezaghèber pa aserká Ministerio Públiko pa hasi un investigashon tokante e spiritu ku ta dualu i skibi karta den Kolegio Ehekutivo.

Si gezaghèber no hasié e tambe ta laga e kosnan aki tuma lugá i ta promové kosnan kontra bon gobernashon. Si Gezaghèber no hasié Ministerio Públiko mester por hasi un investigashon “ambtshalve”  

FUENTE: ARTHUR SEALY