Redakshon
Oranjestad,- Durante e reunion publico dialuna ultimo, lider di oposicion y parlamentario Evelyn Wever-Croes a pone enfasis riba un problema cu, segun e, ta mucho mas profundo cu pregunta cu no ta wordo contesta y reunion cu no ta wordo yama den Parlamento.
“Nos ta un Parlamento. Nos tin un tarea constitucional pa controla Gobierno, pa haci pregunta, pa busca informacion y pa representa e pueblo. Pero pa por haci e trabou aki, nos ta wordo obliga pa busca recurso legal. Esey ta inaceptable den un pais democratico.”
Wever-Croes a señala cu Parlamento ta wordo obliga pa recuri na e Landsverordening Openbaarheid van Bestuur (LOB) y e Landsverordening Administratieve Rechtspraak (LAR), y den algun caso te pa involucra e Gobenador y e Corte den prome instancia. “Y pa kico? No pa haci oposicion. No pa haci show politico. Sino simplemente pa haya informacion cu nos mester pa por haci nos trabou constitucional.” Segun Wever-Croes, esaki ta pone e funcionamiento di nos democracia bou di presion.
“Un Parlamento no mester haci su trabou door di cuminsa caso legal contra su propio Gobierno. Un parlamentario no mester bai Corte pa obliga un minister pa duna informacion cu ta esencial pa e Parlamento por controla Gobierno. Wever-Croes ta adverti cu esaki no por bira e normal nobo.
“Transparensia y dunamento di cuenta no ta un fabor. Ora Parlamento no por haya e informacion cu e mester, su capacidad di controla Gobierno ta wordo debilita.”
Pa Wever-Croes, e solucion ta den un cambio di actitud y di cultura di gobierno. “Nos mester un Gobierno cu ta respeta Parlamento, cu ta contesta y cu no tin miedo di duna cuenta. Y nos mester un Parlamento cu ta firme den su tarea di control.”
“Un democracia fuerte mester un Parlamento fuerte. Nos pueblo merece respet, control y responsabilidad. CAMBIO TA NECESARIO. CAMBIO TA POSIBEL.” Lider di oposicion a termina bisando.
FUENTE: MEP ARUBA/LIE99FM
GIPHY App Key not set. Please check settings