TAYER DI DERECHO HUMANO UN ÉKSITO ROTUNDO — TABATA KOMPLETAMENTE YEN, TA DEMOSTRÁ GRAN INTERES DEN KOMUNIDAT

Kralendijk,- Na nòmber di James Finies, Fundadó di Bonaire Human Rights Organization (BHRO), nos ta orguyoso di anunsiá e gran éksito di e tayer di derecho humano “Nos Tambe Tin Derecho”, ku a tuma lugá djasabra, 22 di ougùstùs 2026, na Biblioteka Públiko Boneiru.

E tayer a alkansá su kapasidat kompletu, ku partisipantenan di diferente nashonalidat, orígen i kultura ku ta forma parti di e komunidat diverso di Boneiru. E kantidat grandi di partisipante ta un refleho positivo di e interes kresiente bou di komunidat na Boneiru pa siña tokante nan derechonan humano fundamental i kon e derechonan ei ta apliká den bida diario.

Pa BHRO, e mensahe tabata kla: hende kier sa nan derechonan. Partisipantenan a haña introdukshon na prinsipionan fundamental di derecho humano i materialnan edukativo, diseñá pa yuda nan komprondé mihó nan propio derechonan i derechonan di otro. E diversidat di esnan ku a asistí tabata partikularmente alentadór i a demostra ku edukashon tokante derecho humano ta relevante pa tur hende, sin importá nashonalidat, orígen, idioma, edat òf background.

BHRO a pone komo meta pa formá 3000 persona na Boneiru den derecho humano durante e próksimo tres añanan. Esaki lo tuma lugá mediante tayernan, anochinan di pelíkula tokante derecho humano, seshonnan informativo den komunidat, aktividatnan edukativo i inisiativanan pa kreá konsientisashon públiko riba di henter e isla.

Presidenta di BHRO, Davika Bissessar Shaw, a bisa:

“Nos meta ta kla: forma 3000 persona na Boneiru den e proksimo 3 anjanan mediante tayernan di derechonan humano, anochinan di pelikula,seshonan informative den komunidat iotro aktividatnan edukativo. Nos ke pa edukashon tokante derecho humano yega tur parti di nos komunidat. Hende mester konose nan derechonan, komprende derechonan di otro i sinti nan mes empodera pa para firme pa dignidat humano.

BHRO ta ekstendé su agradesimentu sinsero na maneho i personal di Biblioteka Públiko Boneiru pa nan sosten i pa a pone un espasio agradabel i aksesibel disponibel pa e tayer. Nos ta apresiá i balorá hopi nos bon relashon di trabou.

BHRO ke ekspresá tambe su apresiashon sinsero na United for Human Rights pa su sosten kontinuo, rekursonan edukativo i kompromiso pa promové edukashon tokante derecho humano. Nan sosten ta un parti importante di nos esfuersonan pa trese konosementu tokante derecho humano direktamente serka pueblo di Boneiru.

Un danki speshal ta bai tambe na nos boluntarionan dediká: Embahadó di BHRO Phenice Frans-Piar, Embahadó di BHRO Joseline Thielman, Kapitan Tulsie Bissessar, Gario Frans di BHRO Youth 4 Rights, Omar Janga i Marjolein Finies. Nan tempu, energia i sosten a yuda hasi e tayer un gran éksito.

Bonaire Human Rights Organization (BHRO)

Dignidat • Igualdat • No-Diskriminashon

FUENTE: BONAIRE HUMAN RIGHTS ORGANIZATION