DISKURSO DI REPRESENTANTE DI ABVO NA FELIS MEMORIA DI PEDRO FELIX

Kralendijk,- Djadumingu 12 di yüli, famia, amigunan i tur esnan ku konosé i a traha huntu ku Pedro Felix a tuma despedida di dje. Representantenan di ABVO Boneiru tabata presente i e Konsehero General di ABVO Boneiru, Nacho Ignacio a tene un diskurso na memoria de Pedro Felix.

Diskurso:

“Den kalidat di Konsehero General di ABVO Boneiru i aktuando na nòmber di presidente di ABVO George Hernandez ku no por ta presente pa motibu di kompromiso familiar, vise presidente Jennefer Hypolite, representantenan di ABVO Boneiru Tafila Janga i kolaboradó Rudsel Leito, kende ta presente huntu ku mi pa dediká algun palabra na felis memoria di kompañero Pedro Felix. E relashon, interakshon i kolaborashon entre ABVO i Pedro Felix, komo Hefe pa Asuntunan di Personal na Teritorio Insular di  Boneiru, i despues OLB, tin un trayektoria largu.”

“Betty Martis, ku a konos’é for di un edat hóben a duna un rekuento di e preparashon akadémiko i profeshonal impreshonante ku Pedro a kompletá i tambe di su karera komo kolega i hefe na POI”.

Nacho Ignacio a bisa ku su eksperensia, den funshon komo miembro di direktiva i eks presidente di ABVO, ku Pedro tabata data for di an̈a 2000 te ku último promé ku e la fayesé. E período promé ku desmantelashon di Antia Hulandes, nos a atendé asuntunan di posishon hurídiko di trahadónan di Gobièrnu na Boneiru den GOA Bonaire.Den e trayekto di traspaso di personal for di e servisionan di Antia Hulandes pa entidatnan públiko nobo, a elaborá un Sociaal Statuut i implementá leinan nobo pa ámtenarnan. Trayekto di transishon di fondo di penshun APNA pa APC i PCN tambe a keda implementá den estrecho kolaborashon entre sindikatonan i e diferente Gobièrnunan.

Den diferente trayekto, manera Seniorenbeleid, Trayekto di Optimalisashon, Komishon di Penshun OLB, ABVO a traha den bon kolaborashon ku Pedro Felix i deportamentu POI

Últimamente Pedro Felix a forma parti di College van Geschillen Participatieraden RCN huntu ku Randolf Luciano i Nacho Ignasio. Su aporte i eksperensia tabata balioso i asertá den konsehonan ku a keda produsí.

Komunidat di Boneiru i OLB mester ta orguyoso i gradesido na e yu di tera aki ku a dediká su bida na Servisio Públiko pa Boneiru. Lástimamente e mes no a haña oportunidat, pa disfrutá di un penshun bon meresí pa loke tantu e la aportá na dje pa tur otro por ta benefisiario di dje.

Ademas Nacho Ignasio, na nomber di ABVO, a menshoná un nota di desepshon, den e asuntu di Seniorenbeleid…! E manera ku OLB a trata e di 3 grupo na kua Pedro Felix ta pertenesé, no ta karesé rekonosementu pa e loyalidat di servisio di e grupo na OLB. OLB mester saminá su konsenshi pa loke ta e inhustisia ku a keda kometé kontra e grupo aki. Huntu ku ABVO, Pedro tabatin un ròl instrumental den e trayekto di opheshon kontra OLB pa aplikashon di Seniorenbeleid ku a resultá den Korte. Lástimamente Hues no a duna rason na e grupo pa motibu di aspektonan tékniko. Pa ABVO e trato di parti OLB ta keda unu inhustu kontra grupo number 3 na kua Pedro ta pertenesé.

Dios lo sa di kompensá Pedro den su Reino pa loke na mundu e tabatin derecho riba dje, sinembargo e a keda privá di dje dor di su dunadó di trabou OLB, ku e a sirbi pa tantu aña. ABVO lo keda rekordá Pedro, komo un empleado públiko dediká, ehemplar, íntegro, sosial, ku a hiba un bida, tantu personal komo profeshonal, a base di balornan i prinsipionan ankrá.

Pedro sosegá na pas i danki pa bo mishon kumplí den e bida aki na mundu. Forsa na famia i amigunan.

Roland Ignacio

Konsehero General di ABVO Boneiru

FUENTE: ABVO BONEIRU/LIVE99FM