Redakshon
Kralendijk,- Aña aden aña afó nos ta para ketu na e susesonan ku a tuma lugá na 1889, kaminda trahadónan dirigí pa lidernan ku sentido pa hustisia sosial a lanta para, kibra ku miedo i protestá kontra abuso i opreshon kontra e klase trahadó.
Ku esaki a pone e simia di e palu di sindikalismo ku awe 136 aña despues a krese bira e bos di e klase trahadó den nos komunidat di derecho demokrátiko. Dia di labor ta pa honra i rekonosé movementu laboral pero tambe e trabou i kontribushon di e klase trahadó na desaroyo i logronan di e komunidat. E simia ku a planta na 1889 a plama rònt mundo kaminda a rekonosé komo derecho fundamental humano di trahadó pa organisá su mes den un sindikato. Den nos reino Ulandes esaki a keda ankrá den nos konstitushon. Pues e ta konta pa nos aki na Boneiru tambe.
Pa duna rèspèt, honor i rekonosementu riba Dia di Labor, nos aki na Boneiru mester para ketu na dos kos/ Nos ta rekordá, duna honor, rèspèt i rekonosementu na tur esnan ku a kuminsá ku e lucha aki, pero alabes nos mester rekordá, duna honor rèspèt i rekonosementu na nos propio historia di sindikalismo.
E ta kuminsá hasta promé ku esun di 1889, ora ku ya na 1795 Tula kompañá pa su koleganan a lanta protestá kontra e abuso laboral riba plantashinan. Igualmente esaki a tuma lugá aki na Boneiru bou di liderato di Martis di Kathalina Janga na 1834.
I den nos historia sindikal di 1795 pasa 1889, bin te ku 1 di mei 2025, nos mester rekonosé honra i duna rèspèt na e multiple luchanan riba tur e islanan di tur nos lidernan ku a demonstrá kurashi.
Lidernan ku a bula e sombra di miedo i a kibra e kadena di menasa i intimidashon pa lanta para i laga nan bos resoná pa defendé derechonan laboral pero alabes tambe lucha duru pa logra desaroyonan positivo pa ku kondishon- i sirkumstanshanan laboral i ku esei traha na progreso i desaroyo di nos komunidat.
Pero den e mesun rosea, mester duna honor, rèspèt i rekonosimentu na tur trahadó ku den union a para firme pa e kousa laboral. Hopi ta esnan ku tantu komo lider i komo trahadó tambe a sufri e mesun kos ku Tula i su kompañeronan.
Igual ku e lidernan di 1889 i otronan ku a dirigí akshonnan popular i trahadónan ku a sostené e lucha, nan tambe a eksperenshá intimidashon, menasa, retiro for di trabou i abandono di kompañero(an) ora mas nan tabatin mester di sosten i apoyo. Hamas i nunka nos lo por lubidá e akshon masal di trahadónan di 30 di mei 1969 kontra abuso i opreshon laboral.
I nos mester rekordá tambe nos generashon di awendia ku tambe a konosé lidernan balente ku te ainda ta bosiferá inkansabel e lucha pa e klase trahadó, pero tambe tur e trahadónan ku a komprondé e lucha i ku den UNION ta sosteniendo e lucha.
Nan i nos tur meresé e honor, rèspèt i rekonosimentu dia 1 di mei awor esta DIA DI LABOR. P’esei mi a proponé na USIBO ku a brasa esaki pa ban instituí formalmente i ofishalmente un muestra di honor, rèspèt i rekonosimentu na un òf mas trahadó ku den e lucha pa mantené derechonan atkerí pa e klase trahadó tambe a bira viktima di mesun akshonnan ku semper e dunadó di trabou di mala fe a usa, esta intimidashon, menasa, retiro, no alargá kontrakt, ets. ets.
Laga komunidat kompleto, pero mui en espeshal e sektor laboral realisá ku nan tambe a kibra ku e kadena malvado di intimidashon, menasa, retiro, no alargá kontrakt i tambe ku nan a usa e yabi di kurashi pa bula e sombra di miedu i kobardia di nan mes i lanta para pa loke ta derecho fundamental i libertatnan demokrátiko di nos tur, afiliando nan mes na un sindikato i organisando i stimulando na kompañero(a) di trabou pa nan tambe afiliá i asina den UNION logra adelantonan positivo pa ku kondishonnan di trabou, pero tambe logra traha den un ambiente sigur i salú riba flur di trabou.
E logro di mas grandi ku nos tur komo trahadó mester ta orguyoso di dje aki na Boneiru ta e rèspèt i rekonosimentu ku e klase trahadó a logra di ta partner igual na mesa huntu ku gobièrnu i sektor di dunadó di trabou pa huntu traha na un desaroyo sosial ekonómiko duradero i balansá pa nos isla. Nos tambe ta konta i semper lo mester skucha nos i duna nos partisipashon real.
Si loke a trese dilanti aki a mishi ku bo alma i kurason, demonstrá esaki i presentá masal na e selebrashon di Dia di Labor djaweps awor 1 di mei di 11’or pa 2’or di mèrdia na sede di AFWB, riba Kaya Korona i topa sosialmente ku bo kompañero(a)nan i reflekshoná riba boso kada un su balor i e kontribushon ku kada un di boso a duna i ta dunando na desaroyo di nos dushi Boneiru.
I kòrda semper: Kaminda sindikalismo ta fuertemente organisá, ei nan derechonan di hende ta mas tantu respetá.
FUENTE: NÒCHI WILLEM/LIVE99FM
GIPHY App Key not set. Please check settings