UN BIAHA MAS TA PROBÁ KU LUCHA PA HUSTISIA SOSIAL TA UN LUCHA KONTINUO I KU TA EKSIGÍ KU SINDIKALISMO TA ALERTA 24 ORA 7 DIA PA SIMAN.

Kralendijk,- Huntu ku diferente organisashon sosial tantu aki na Boneiru komo na Ulanda.

Huntu ku sektor polítiko i huntu ku sektor empresarial i finalmente huntu ku pueblo boneriano nos a lucha duru pa na aña 2024 por a regla un ònderstant na drechi pa esnan ku no por sòru pa nan propio eksistensia, ya ku pa un motibu òf otro no tabata por partisipá den e proseso laboral.

E lucha a logra tambe ku a regla un penshun di behes hustu, sigur pa esnan ku penshun di behes tabata nan úniko entrada.

Nos a konvensé nos gobernantenan ku no por trata esnan ku a konstruí e komunidat aki manera paña sushi di benta afó i mester a garantisá nan un eksistensia desente pa loke ta e tersera fase di nan bida. Finalmente e lucha a keda koroná ku esnan ku ta traha pa nan gana nan pan di  kada dia i ku e pan ei kria tambe nan famia a risibí un sueldo minimo ku por kubri nan gastunan mensual.

A lucha i logra tambe pa nos muchanan di 0 te ku 12 aña por a haña un akohida den dia i un akohida despues di skol den un ambiente sano i sigur pa guia nan den un forma profeshonal den nan desaroyo. Un pago di 231 dòlar pa luna pa yu ta muestra ku a duna atenshon na nos chikínan. Ku esaki sindikalismo a yuda prueba ku ta midi un komunidat su grado di sivilisashon na e forma ku e ta trata esnan mas vulnerabel, esta esnan chikí, esnan ku no por partisipá den e proseso laboral i esnan ku a duna 2/3 parti di nan bida ku nan labor na konstruí nos komunidat, pues nos grandinan, nos penshonadonan.

I e logronan aki nos huntu atrobe mester keda alerta pa no mishi ku nan i bolbe hinka nos den pobresa i hasta miseria. Sindikalismo en todo kaso lo no drumi i laga e koriente malu ku ta reina na Ulanda hiba nos den un direkshon robes atrobe.

A logra pa Tweede Kamer akseptá siman pasá un moshon ku ta korigí e eror ku esnan ku ta gana sueldo minimo lo mester a bai paga belasten. A bari esaki for di riba mesa, pues tur kobradó di sueldo minimo por ta trankil.

Boso NO mester paga belasten riba boso sueldo minimo. Pero e gran pero ta atrobe e intenshonnan malu ku e gabinete aktual tin. Nan kier usa e korekshon aki pa bin ku un lei di emergensia den kua ta korigí e eror di e belasten riba sueldo minimo, pero kier entrodusí si belasten di 35.4% riba entrada nèto di 50 mil dòlar pa aña, oumentá belasten riba inmueble, riba dividendo, pero tambe kier para e supsidionan riba tarifa fiho di awa i koriente i e krédito di 1300 dòlar riba kuenta di koriente ku tabata duna sierto grupo pa paga WEB.

E medidanan aki lo afektá en grandi e klase media i e empresarionan chikí ku konsekuensia ku nos lo bai eksperenshá oumento di preis di awa, koriente pero tambe di komestibel i preis en general. En general nos lo bai eksperenshá un baimentu atras di nos forsa di kompra di minimal 10%. Esaki miéntras na Ulanda Oropeo e mesun Gabinete a tuma medida netamente pa oumentá e forsa di kompra. Dia 11 di dézèmber awor lo tin debate den Tweede Kamer tokante e minimo sosial. Sindikalismo a hasi tur esfuerso pa laga miembronan di Tweede Kamer komprondé dos kos, esta posponé plan di belasten 2025 te  2026 i alargá e supsidionan tambe te 2026 i laga nos usa e aña 2025 pa bai den un konsulta esta diálogo serio entre ministerio di finansas i nos aki na Boneiru.

Ta basta papia tokante di Boneiru i ban papia ku Boneiru. Nos no ta den tempu di kolonia mas, mester duna rèspèt na Boneiru, No ta akseptabel, sigur no pa sindikalismo ku Den Haag ta dikta sin tene kuenta ku e realidat aki na Boneiru. I ken mas mihó konosé e realidat di Boneiru ku no ta partisipantenan den Diálogo sentral, representando e sektor polítiko, e sektor empresarial i e sektor laboral ku konsehero e unidat di asuntunan sosial i di labor. Den Haag mester skucha Boneiru. Dia e reunion tuma lugá e siman aki nos lo bai skucha ku si Den Haag ta skucha si òf nò.

FUENTE: NORWIN WILLEM/LIVE99FM