TA KOALISHON TA RESPONSABEL PA MANEHO I PRESUPUESTO

Kralendijk,- Unda ku bo pasa tin reklamo tokante di e forma kon gobernashon ta na e momentunan aki. Basta tempu kaba ta nota ku no tin direkshon pero mas bien un bruashon total.

Muestra di poder i akshon di gobernashon ku ta lanta hopi duda den komunidat ta na orden di dia. Ningun hende den komunidat no ta kompronde ta ki rumbo e gobiernu aki kier hiba Boneiru. Supuestamente e gobernashon aki ta wordu dirihi dor di Clark Abraham, pero ningun hende no ta mira ta kiko Clark su vishon ta. Pasobra nos tur ta korda ku Clark su vishon ta pa hasi Boneiru manera e isla di Finlanda ku ta karga e nomber Aland.

Inkluso t’asina ku Clark a logra konvense e eks-miembro di Konseho Insular di MPD, señor Ceril Vrolijk den e biahe pa Aland pa tumba e gobiernu di MPB.

Awe nos niun no ta tende nada mas di Aland. Tin mal gobernashon i sin rumbo. Presupuesto no ta abase di vishon pa desaroya Boneiru sanamente.

Ta sobra sen na miyones pasobra no tin gobernashon. Ta korta den turismo i den ekonomia di Boneiru. Ta stroba desaroyo di sektor di konstrukshon. Sueldo minimo ta bai paga belasting. Hendenan den nesesidat tin un gobiernu ku ta bringa kontra nan enbes di yudanan. Asina por sigui nombra mas barbaridat di e gobiernu aki.

Lokual ku hopi hende no ta realisa ta ku ta e 5 miembronan ku ta sostene e gobiernu aki ta responsabel pa e disaster aki. Ora sobra riba 30 miyon sin usa esaki pa pueblo, ta responsabilidat di e 5 miembronan di Koalishon.

Meskos ta konta pa e kortamentu den turismo i sektor di konstrukshon. Meskos tambe ta konta pa e maneho desastroso asoshal kontra di hendenan di menos rekurso.

Ta e 5 miebronan di koalishon mester defende pueblo. Pero e 5 miembronan ta sinta man krusa i ta laga gobiernu masakra pueblo. Ta blo skirbi komunikado manda bisa pueblo “tene pasenshi”. Tene pasenshi pasobra ainda tin mas disaster na kaminda.

E 5 miembronan aki di Konseho Insular no ta kompronde ku nan trabou ta pa defende pueblo kontra di un gobernashon ku oviamente ta destrosando nos komunidat. Un biaha mas maneho i presupuesto di nos komunidat ta responsabilidat di e 5 miembronan aki ku ta sostiendo e gobiernu aki. Tur lokualnan ta bai robes ta pasobra e 5 miembronan aki ta di akuerdo ku ta asina aki kos nan mester bai.

FUETE: JAMES KROON/LIVE99FM