Redakshon
Kralendijk,- Djabièrnè último miembronan di direktiva di PCC, sr. Van der Linde i sr. Sietsma huntu ku presidente di AFBW, sr. Cherel Kwidama den un sala yen di trahadónan di PCC a firma un akuerdo pa un CAO 2025 – 2026.
E puntonan ku a yega na akuerdo riba dje lo drenta na vigor for di 1 yanüari 2025.
PCC ta na mesa ku AFBW sigur, pa 1 aña kaba pa yega na un CAO pa e trahadónan di PCC.
Pero pa por a yega dje leu aki mester a hasi diferente kambio i ahuste den e organisashon, mirando ku PCC tabata tin dos grupo di trahadó, den un organisashon ku dos diferente regla pa personal. Pa por a hasi e harmonisashon aki PCC a laga e kompania FWG Progressional People, hasi esaki i negoshá un CAO di 2 aña, di 2025 – 2026 pa e trahadónan.
AFBW i FWG tin hopi aña di konosementu riba e aria di harmonisashon i negoshá CAO, un ehèmpel di esaki ta e CAO Zorg BES. Negosiashonnan a kana hopi bon, ta tin kaminda ku mester a buta mas reunion pa por a yega na diferente kombenionan.
Trahadónan den e harmonisashon, aki no a bai patras den nan kondishonnan laboral i a logra diferente benefishinan nobo.
Tur loke a wòrdu akordá den e convenant ta bini bek e den e buki di e kontrato kolektivo laboral (CAO).
Na luna di yanüari i febrüari partidonan ta bini huntu pa asina yega na un buki di CAO.
E forma i método ku ta wòrdu uza ta e mesun modelo di CAO Zorg BES.
PCC tambe ta pensa pa por sigui e CAO Zorg BES òf bira partner na mesa di negoshashon pa e próksimo CAO Zorg BES 2027.
Hasiendo e paso aki ta otro logro mas pa trahadónan den e sektor di kuido.
AFBW ta mustra kon un dunadó di trabou ku si ta mira e importansia di e trahadónan pa por wòrdu sirbi ku un CAO i no ku un regla pa personal. AFBW ta sumamente agradesido i positivo ku mas i mas dunadó di trabou lo aseptá sindikato i sinta na mesa i negoshá un CAO pa nan trahadónan.
AFBW ta duna un pabien na e trahadónan di PCC, Gerensia di PCC, Shopsteward nan di PCC i tambe na negoshadó di AFBW Sr. Norwin Willem.
Danki na kada unu ku nos por a dal e promé paso importante aki pa yega na un CAO pa e trahadónan.
“Laga nos keda den union, paso huntu i uni nos tin forsa”.
FUENTE:AFBW/LIVE99FM
GIPHY App Key not set. Please check settings