AKSHON DI LIMPIESA PA DIA DI BONEIRU

Kralendijk – E lema pa Dia di Boneiru di e aña aki ‘Un Boneiru Limpi. Nos Deber, Nos Orguyo’ ta pone un énfasis spesial riba e insentivo pa semper tene nos isla limpi i bunita. Komo preparashon pa Dia di Boneiru, dia 17 di ougùstùs ta organisá akshon di limpiesa den sinku bario i algun otro sitio na nos isla. E akshon di limpiesa akí ta tuma lugá for di 7 or di mainta pa 4 or di atardi. Ta pidi habitantenan di Boneiru pa koperá ku e inisiativa positivo akí pa hasi nos isla limpi.

Kada bario lo tin un of dos punto di enkuentro ku fasilidatnan manera saku di sushi, kos di bebe i tambe músika pa krea un ambiente festivo. Selibon N.V. lo pone 10 baki di sushi grandi den e diferente barionan, kaminda e partisipantenan por depositá e shushinan ku nan a rekohé. Promé ku e aktividat tuma lugá, esta promé ku 17 di ougùstùs, miembronan di e komishon di Dia di Boneiru lo repartí saku di sushi.

Komishon di Dia di Boneiru ta hasi un yamada masal na tur habitante di Boneiru, pa sea individualmente òf den grupo, yuda ku un ánimo festivo pa rekohé sushi den nan bario. Nos ta invitá tur habitante, bishitante, kompania i organisashon pa partisipá den e aktividat importante aki. Sushi riba kaya ta un problema persistente ku ta pidi nos esfuerso kolektivo.

Durante un rueda di prensa ku a tuma lugá awe mainta 7 di ougùstùs, diputado Nina den Heyer a bisa: “Un isla limpi ta fundamental pa nos salú i bienestar. Un Boneiru limpi ta reflehá nos amor pa nos isla i e orguyo ku nos ta sinti p’e.”

𝗛𝘂𝗻𝘁𝘂 𝗻𝗼𝘀 𝘁𝗮 𝗸𝗼𝗻𝘁𝗿𝗶𝗯𝘂𝗶́ 𝗻𝗮 𝘂𝗻 𝗕𝗼𝗻𝗲𝗶𝗿𝘂 𝗺𝗮𝘀 𝗹𝗶𝗺𝗽𝗶 𝗶 𝗺𝗮𝘀 𝗯𝘂𝗻𝗶𝘁𝗮.

FUENTE: KOMISHON DIA DI BONEIRU/LIVE99FM