UN PABIEN NA PARTIDO DEMOKRAT DI BONAIRE KU A SELEBRÁ SETENTA AÑA DI EKSISTENSIA DEN BARIO DI RINCON.

Kraledijk, – Demokrat a pasa den diferente krísis ku a kondusí na sigur sinku kiebro ku diferente motibu. E promé kiebro tabata ku señor Eldé Gerharts, e di dos tabata ku señor Broertje Janga, di tres ku señor Ruman Ellis , di kuater ku señor Tului Domacassé i di sinku ku señor Ròbi Beukenboom. Tambe tin e periodo di krísis di liderazgo ku a kondusí na un maneho di tres persona manera tempu di Imperio Romano.

Pa haña un entrada den historia di Demokrat ta na su lugá pa direktiva di partido, konseho di partido, konsehal i diputadonan risibí i lesa e bukinan di Trix van Bennekom “Abraham kroniek van een politieke dynastie” i Ignorancia ò educando un pueblo” di Medardo de Marchena komo literaturanan obligatorio pa lanta interes pa siña kon demokrasia ta funshoná a base di  debate i defendé maneho for di ideologia di partido.

Despues di setenta aña di partido demokrat mi ta opservá ku partido ta bayendo den direkshon di un maneho outokrátiko ku tur poder den man di e lider i ta hibando  un polítika konservativo derechista ku sosten di M21 i independiente Vrolijk. Pa skonde e maneho outokrátiko ta usa e palabra partisipashon. Si pueblo ta kere ku e ta bai aportá den maneho di Bonaire e por wèl lubidá. Partisipashon den e kaso aki ta nifiká duna pueblo di konosé kiko a disidí ku ta nifiká “take it or leave it” òf “guli manda abou”

FUENTE:ARTHUR SEALY  /LIVE99FM