CFT TA BISHITÁ SINT EUSTATIUS I SABA

Oranjestad/The Bottom – Riba 25 i 26 di mei, Kolegio di supervishon finansiero di Boneiru, Sint Eustatius i Saba (Cft) a bishitá Sint Eustatius i Saba. Cft a deliberá tokante di e situashon finansiero aktual, e entidatnan gubernamental i proyektonan aktual ku e Kolegionan Ehekutivo i e Kolegionan Insular. Riba Saba, Cft a tuma despedida di Gezaghèber saliente Jonathan Johnson. Riba ámbos isla, Cft ta konstatá un mehorashon stabil di maneho finansiero, i ta enfatisá e importansia di koutela kontinuo den un entorno kambiante.

Sint Eustatius

Cft ta opservá ku den e último añanan, Entidat Públiko a hasi progreso konsiderabel den maneho finansiero, di kua e deklarashon aprobatorio di ouditor tokante di 2024 tabata e resultado mas evidente. Banda di esaki, Sint Eustatius ta mustrando plannan pa mehorá e kapasidat di implementashon, i e isla ta kontinuá riba e kaminda pa ta ‘in control’ duraderamente. Ademas, ku STUCO i EUTEL, Sint Eustatius tin dos entidat ku ta ehekutá tareanan públiko importante, i ku ta poseé un infrastruktura esensial. A base di e informashon disponibel, Cft ta konsiderá ku e funshonamentu aktual di e entidatnan ta relativamente stabil, aunke den e tempu benidero nan lo enfrentá retonan operashonal. Durante su bishita, Cft a bishitá haf, The Cliff i e proyekto di bibienda sosial, kaminda ta konstruyendo 36 kas di hür sosial nobo. E proyektonan aki ta importante pa e desaroyo ekonómiko i sosial di Sint Eustatius. Cft ta konstatá ku den e áreanan aki ta hasiendo progreso visibel.

Saba

Cft ta bolbe ekspresá su apresio pa e kalidat haltu di e maneho finansiero di Saba. E presupuestonan ta na òrdu, i nan ta wòrdu entregá na tempu. Banda di esaki, Cft ta opservá ku Saba ta manteniendo e desaroyonan positivo aki. Ademas, ku Saba Electric Company (SEC) i Satel, Saba tin dos entidat gubernamental ku ta ehekutá un tarea públiko i ku ta poseé un infrastruktura importante. E informashon disponibel ta mustra ku e entidatnan aki tambe ta funshoná relativamente stabil, aunke nan ta enfrentá retonan operashonal tambe. Ademas, Cft a tuma despedida di Gezaghèber Jonathan Johnson, kende ta baha despues di 18 aña. Señor Johnson a hasi un kontribushon importante na e stabilidat finansiero i atministrativo aktual di Saba. Cft a gradisié sinseramente pa su añanan di dedikashon i trabou.

Finalmente, pa ámbos isla ta konta ku nan ta operando den un mundu ku aktualmente ta den moveshon,

loke ta rekerí atenshon kontinuo pa maneho finansiero kuidadoso i resiliente.

FUENTE: CFT/LIVE99FM