BONAIRE HUMAN RIGHTS ORGANIZATION A PARTISIPÁ DEN E 25 SESHON DI NASHONAN UNÍ RIBA ASUNTONAN INDÍGENA NA NEW YORK

Kralendijk,- Un di e Enkuentronan Anual di Pueblonan Indígena mas Importante di Nashonan Uní

E di 25 Seshon di e Konferensia di Nashonan Uní riba Asuntonan Indígena na New York, ku a tuma lugá durante e dos ultimo simanan, ta un di e eventonan anual mas importante di Nashonan Uní dedika na Pueblonan Indígena na tur parti di mundu. Bonaire Human Rights Organization tabata representá durante henter e seshon pa su Presidente, Davika Bissessar Shaw, i Fundador, James Finies.

E Konferensia ta reuni representantenan i lidernan indígena di pueblonan manera e Māori di Neuva Zeelandia, e Sami di e Artiko, e Maya di Amérika Sentral, e Mapuche di Chile, e Inuit di Canadá i Greenland, Nashonan Nativo Amerikano, Pueblonan Aboriginal di Australia, e Ainu di Japon, komunidatnan indígena Tibetano i Uyghur di China, i pueblonan indígena di regionan di Karibe, Áfrika i Pasifiko.

E seshon di e aña aki a enfoká riba salú di Pueblonan Indígena den konteksto di konflikto. Un tema ku BHRO a deklará ku esaki ta reflehá klaramente e realidatnan di Boneiru relashoná ku desigualdat struktural, preshon ambiental, dependensia I subordinashon konstitushonal i outogobernashon no resolve, i e desplazamentu demográfiko rapido di e pueblo indígena nativo Boneiriano, ku a baha di kasi 80% pa ménos ku 30% den un periodo di diesinku aña.

Durante e seshon, BHRO a partisipá i hasi varios diskurso den mas ku 50 debate, side events, eksibishonnan i enkuentronan kultural tokante deskolonisashon, derecho di poseshon di tereno I tera, edukashon indígena, preservashon di idioma, migrashon klimátiko, hustisia reparatorio, ekstrakshon kolonial di rekursonan natural, soberania di data indígena, i fortalesementu di institushonan indígena. BHRO tambe a entregá un keho formal, inkluyendo rekomendashonan tokante e kaso di Boneiru, na e 25 Seshon di Nashonan Uní riba Asuntonan Indígena.

BHRO un biaha mas a pone e situashon di Boneiru na atenshon internashonal BHRO e situashon grave di Boneiru, ku pueblonan indígena, abogadonan di derechonan humano i institushonan di tur parti di mundu i a deklará ku e ta plania di trese bek Boneiru e konosementu, relashonan ku institushonnan internashonal, kontaktonan stratégiko i eksperensianan kompartí ku nan a haña durante e konferensia pa fortalesé konsenshi indígena, edukashon di derechonan humano, i e lucha internashonal kontinuo pa rekonosementu, protekshon i outodeterminashon di Boneiru.

FUENTE: BONAIRE HUMAN RIGHTS ORGANIZATION