E KARTANAN POLITIKO NA BONAIRE A KEDA HESHÒFEL, DESPUES PARTÍ PERO AWOR, TE NA E MOMENTO KU NOS TA SKIRBI E KOLUMNA AKI, TA MAL PEGÁ RIBA E MESA.

Kralendijk,- Despues di e akshon balente di Salma Serberie i despues ku M21 tambe a bandoná e koalishon bieu, tabatin un speransa pa un gobièrnu nobo i fuerte.

Pero esakí diripente ta na distansia atrobe,  sofoká den un wega polítiko ku ta parsé mas i atrobe un arogansia di poder enbes di e boluntat pa sirbi e isla. E negosashonnan aparentemente a frakasá. E rasón? E partido Union Patriótriko Boneriano (UPB), e partido ku a tuma liderazgo den e negosashonnan, no kier laga M21 ku su diputado.

Esakí ta un posishon ku ta mustra den nos konsepto un eror polítiko. Laga nos mira e echonan. UPB tin 3 di e 9 asientonan den konseho insular. Esakí no ta mayoria. Pa por goberná, e partido mester tin sosiosnan. Sosionan ku, igual ku UPB, a haña un mandato di e pueblo. M21, e partido ku ta keda nengá un diputado, a tuma un riesgo pa yama ayó na e koalishon bieu. Nan a habri e porta pa un komienso nobo. Kua ta e rekompensa pa esakí? Un sla den kara. E mensahe di UPB ta kla: nos kier e votonan di boso, pero no e kontribushon di boso na e gobièrnu.

Un dicho den polítika ta bisa lo siguiente: “Si bo no tin mayoria, bo mester pone awa den biña  pa por yega un kaminda”. Pero esakí aparentemente no a pasa. Ta akinan netamente un parti di e problema ta. UPB ta aktua na un manera sifuera nan tin e mayoria apsoluto, mientras e realidat ta ku sin e aporte di M21, MPB òf e otro miembronan independiente, nan no ta yega ningun kaminda. Ku nan insistimentu riba dos diputado pa nan mes i nada pa M21, no solamente nan ta insultá un posibel partner den gobernashon, pero nan ta habri e porta pa e gobièrnu aktual keda na poder – e gobièrnu ku hustamente hopi di Boneiru kier wak pa pasa pa olvido mas pronto ku ta posibel. E ironia ta ku mientras tin un bataya di arogansia di poder, e lider polítiko di e tolda kòrá ku netamente, no awor pero kada bes ku e drenta gobernashon ta krea kaos, ta keda na su posishon.

Kon ta sigui awor? E próksimo elekshon lo ta na mart 2027. Dos aña i algun luna despues di e kaida di e promé gobièrnu despues di elekshon na 2023, Boneiru ta grita pa un gobièrnu fuerte i stabil. Boneiru ta grita pa un konseho insular ku mester bai bèk su base i reorganisá su mes di tal forma ku su prosesonan di desishon ta efisiente. Boneiru ta grita pa un situashon bon kla kaminda nan sa ken ta goberná e isla i no kaminda representantenan di pueblo ta bai sinta riba stul di gobièrnu. E desafionan pa ku nos ekonomia, finansas, infrastruktura i e relashon ku Hulanda ta enorme. Un gobièrnu sin poder no por atende esakí. E instabilidat politiko ku a krea awor ta un luho ku Bonaire no por pèrmití.

Ademas, na Hulanda un gabinete nobo ta na kaminda. Den Haag lo kuminsá intensivá su bista riba nos. Nan ta mira un isla ku ta tuma su responsabilidat i ta un sosio stabil, òf nan lo mira un sirko polítiko ku ta hundí den ego i hamber pa poder? Si e polítika lokal no por forma un gobièrnu, e chèns ku Hulanda lo intervení direktamente – un senario ku ningún hende na tinu kier – ta krese kada dia. E posishon duru di UPB por ta e tapeit kòrá pa e representante di Reino drenta den asuntunan lokal. Kòrda ku artíkulo 232 di WolBES ta papia palabra kla: Pa medio di un lei, Hulanda por tuma medidanan den e kaso ku e gobernashon di un entidat públiko gravemente ta deskuidá su deber- i tareanan.

E kaminda pa dilanti ta klaro pero inevitabel: UPB mester pone awa den biña. Polítika ta e arte di kompromiso, no di diktado. Un kos tambe mester ta bon kla si. I esaki ta e otro banda di e problema. M21 bou di ningun sirkumstania no por keda ku e kartera di finansas ku nan un asiento. Nan mester por komprondé esaki si. Otro kartera si pero no esun di finansas. Nan tambe tin ku basha awe den biña. I korda bon MPB ta mas grandi i eksperensiá ku M21. E koalishon anterior tambe tabata un desaster ku kontribushon di M21. Esakinan ta faktornan ku M21mester kanta un tono mas abou. Awor ta e momento pa laga e arogansia di poder i realisá ku goberná ta un responsabilidat di tur. E preis di e biña ku un tiki awa den dje no ta nada kompará ku e preis ku Boneiru ta bai paga si kosnan sigui manera nan ta. Ta tempu pa liderato, tempu pa demonstrá arte di gobernashon, tempu pa asumí responsabilidat. Tempu pa konstruí enbes di destruí.

Pero tin mas kos di atenshon. Korte Hulandes e siman ku a pasa a dikta ku Estado Hulandes ta fayando den su aserkamentu pa ku kambio di klima, konfirmando ku siudadanonan di caribe hulandes tin derecho riba protekshon igual y trato igual. E prinsipio aki ta afektá Boneiru tambe. Nos ta forma parti di Hulanda i nos ta siudadanonan Hulandes, pero nos ta wòrdu tratá strukturalmente desigual. E isla aki meresé e mesún protekshon, atenshon, y invershon ku kualke otro munisipio hulandes. Derechonan igual pa siudadanonan igual no ta un fabor, sino un derecho fundamental y un obligashon moral. Loke ta konta na Den Haag mester konta pa Boneiru tambe.

Relashoná ku esaki pueblo di Boneiru aktualmente ta wòrdu kòrtá demokrátikamente. Den e kaso aki di un direkshon ku lo bo no spera. Boneiru tin derechi riba 19 asiento den konseho insular, pero e derecho ei deliberadamente ta wòrdu blòkiá dor di partidonan polítiko pa mantené poder. Esaki no ta solamente un fayo pero tambe un violashon di e konfiansa di e votadónan. Ningun hende no a puntranan nada anto pió ainda ta reuní tras di porta será pa loke ta trata e tópiko aki. Ora nos propio lidernan nenga derechonan di nan mes suidadanonan i stroba renobashon demokrátiko, mester protestá kontra esaki. Pa tin mas asiento den konseho insular di alomenos 15, ta un derecho i no fabor. Partidonan polítiko tin ku sali tambe pa e derecho igual aki ku pa kolmo no ta wòrdu strobá dor di Hulanda pero dor di nos mes partidonan polítiko. Ku e veredikto di wes aki pa ku derechonan igual no tin kuestion mas di ‘cherry picking’.

FUENTE: WILLEM CECILIA