NORWIN NOCHI WILLEM TA YAMA UN DANKI I ALABES UN PABIEN NA TUR TRAHANDO KU TABATA PRESENTE 15 DI OUGÙSTES ULTIMO  DEN KURA DE AFBW

Kralendijk,- Trahadónan den kuido di Mariadal, MHC, ZWG, PCC i Stichting Project. Trahadónan miembro di AFBW i trahadónan en general ku tabata físikamente presente na e manifestashon popular pasífiko riba djasabra 15 di ougùstes den kurá di AFBW.

Na boso un danki i pabien alabes pa boso posishon di prinsipio i di para fuerte, determiná i desisivo pa loke ta hustu i bon, esta e norma nobo di entrodusí 36 ora di trabou pa siman ku mantenshon di tur bo derechonan.

Ta ku boso sosten físiko pero tambe moral i alabes ku un tim bon motivá, kreativo i krítiko ora mester, nos a negoshá ku un siguransa i trankilidat enorme guiá pa e forsa universal di ku hustisia ta prevalesé semper pa haña tur hende na mesa, esta dunadónan di trabou di 7 instituto i tres sindikato prosedente di e islanan Boneiru, Saba i Statia nan nanishi den un solo direkshon, apesar di tin diferente interesnan. Un solo direkshon, un solo meta tabata e brùg di UNION na mesa i ku a basha tur e murayanan di divishon ku por tabata eksistí abou. I e un solo direkshon i meta tabata tin komo punto sentral e dignidat i bienestar di e HENDE den kuido. KUIDA NAN PA NAN POR KUIDA NOS TABATA E LEMA KU A ZONA NA TUR MOMENTO DI NEGOSASHON basá riba e prinsipio i norma di Igualdat.

“ Dignidat di HENDE no ta sifra, no ta kalkulashon i sigur no ta sèn. E ta e nivel di sivilisashon ku nos komo hende por yega pa distinguí nos komo parti di kreashon for di animal i vegetashon i tur otro kreashon. Den e kaso spesífiko aki ta e derecho fundamental humano di IGUALDAT. I no igualdat pará riba su so, pero komo parti integral di e nivel ku humanidat a grita na bos haltu na 1795, esta LIBERTAT, IGUALDAT I FRATERNIDAT. Libertat so, sin rekonosé igualdat hamas por krea fraternidat(amistat) entre hende, laga para entre nashonnan. Hulanda den e Reino ku nos ta aden a pèrdè konsiente o inkonsiente e momento pa krea e tríángulo aki ku lo a nifiká un pas berdadero den REINO i no gritunan bashí ku solamente e propósito pa gana simpatia polítiko.  E momentonan tabata 1 di yüli 1863, 15 di dézember 1954 i 10 di òktober 2010. Esun mas skur tabata 1 di yüli 1863, kaminda estado Hulandes a paga “shonnan”  pa kumpra libertat di kada un di nan katibunan. Te awe Hulanda ta nenga for di su propio boluntat di rekonosé e di dos pilá esta IGUALDAT. Pa tal rason hamas por tin pas i konfiansa den otro den Reino. I si estado Hulandes den persona di Mark Rutte i Kas Real den persona di Willem Alexander a bin públikamente bin pidi despensa i pordon, berdaderamente Mark Rutte tin rason ku e frase no a kaba tras di e kòma. Pa sera e triángulo di harmonia i pas, HULANDA, no ku palabra so, pero ku echos mester demonstrá ku e ta rekonosé ku nos ta IGUAL ku nan; Ta basta ku palabra bashí. IGUALDAT DI HENDE no ta negoshabel, e ta òf e no ta. I Hulanda por ta sigur ku den e tempunan benidero, sigur di parti di sindikalismo responsabel ta un mensahe lo yega Hulanda esta ku nos  ta eksisgí Igualdat. E por ta otro den ehekushon pero HAMAS I NUNKA ménos”. Nos ta kuminsá ku norma di orario di trabou, esta 36 ora pa siman i kondishonnan laboral den kuido, pero nos lo amplia riba tur otro aria. I e wega di dividí i goberná ku nan a praktiká den e klase trahadó, esta empleadonan públiko tantu di RCN komo di OLB si i otro sektornan nò; e simia maligno di derskriminashon i desigualdat ku nan a planta den nos propio komunidat i ku aparentemente nan a kere ku nos lo aksepté komo normal, nan a dal nan dede duru duru ku sindikalismo uní den USIBO. P’esei meskos ku na 1795, awor e klase trahadó mester ta prepará i armá spiritualmente pa bai all the way pa logra e mesun Igualdat ku tabata e meta den e lema di Revolushon Franses, esta LIBERTAT, IGUALDAT I FRATERNIDAT “ Dunadónan di trabou i trahadónan den kuido ta bai dilanti. Abo trahadó i bo famia ku no tabata t’ei na e manifestashon, realisá ku éksito di e lucha aki lo konta pa abo i bo famia tambe. Minimalmente bo por duna bo sosten komo e sakrifisio di mas chikí ku bo por hasi. Nos komo lidernan sindikal lo hasi e sakrifisio grandi ku tur su riesgonan. E mesa di negosashon di dunadónan di trabou i sindikatonan djabièrnè a firma huntu e kompromiso aki pa ku trahadónan den kuido. Esaki lo ta e komienso di un kompromiso pa 27 mil hende bibá na Boneiru, Saba i Statia.

FUENTE: NORWIN NÒCHI WILLEM, KONSEHERO USIBO