UN KRISIS GUBERNAMENTAL TIN KONSEKUENSIA DIREKTO I KU POR MIDI PA EKONOMIA I MERKADO LABORAL.

Kralendijk, – Un krisis gubernamental tin konsekuensia direkto i ku por midi pa ekonomia i merkado laboral. I sindikalismo mester ta alerta i tuma posishon den esaki. Nos ta pa 50% dependiente di Turismo, esta pa nos entradanan i pa trabou. Instabilidat gubernamental, ta pone ku  invershonnan i maneho duradero ta sufri retraso di ehekushon di maneho, tin posponementu di invershonnan, nos ta konstatá oumentu di gastunan, tin ménos okupashon di kambernan i inseguridat serka dunadó di trabou i trahadó ta oumentá.

Laga nos para ketu un ratu riba loke nos a skibi aki riba. E krisis ta okashoná un paro den maneho i ehekushon, kual ta nifiká konkretamente den pèrmitnan ku ya ta retrasá ta haña mas retraso, invershon den proyektonan ta ser suspendé i no por plania pa término largu.  Pa loke ta gastunan tantu pa empresanan komo pa kasnan di famia ta subi entre otro dor di preis di koriente. Pa un famia ku dos yu, esaki a subi ku 30%. Pa empresanan esaki ta nifiká gastunan mas haltu pa operá e negoshi, ménos espasio pa mantené trahadó na trabou òf pa oumentá salario. Pa e sektor turístiko esaki ta nifiká un preshon haltu. Turismo komo e motor di Boneiru ta bai eksperenshá dor di e instabildiat aki, sifranan mas abou di okupashon, invershonnan den e sektor ta keda posponé i ta krea inseguridat serka e partnernan internashonal. Su konsekuensia pa infrastruktura ta retraso den infrastruktura i vivienda, eskases di vivienda pagabel, preshon riba kareteranan. Dor ku ta hala handrèm riba kresementu ekonómiko e ta bira difisil pa atraé personal nobo i tene esnan eksistente na trabou.

Konsekuensia pa e merkado laboral. Dor ku ta posponé tur invershonnan, e kresementu ekonómiko ta sanka i retrasá e seguridat di haña trabou ta baha, pasobra e demanda pa trahadó ta baha, nos ta bai haña nos ku un oumentu grandi di kontraktnan temporal manera nul-uren, oproep, min-max i pa tempu definí. Trahadónan den sektor turístiko ta esnan mas vulnerabel. Sobadjé nan no ta organisá den sindikato ainda, pues nan ta bai kore riesgo di keda retirá i esnan ku keda ta bai sinti ku nan forsa di kompra ta baha, gastunan ta subi i nan salario no ta subi equivalente. Ta bira mas difisil pa haña trabou nobo. E entrodukshon di kompensashon di desempleo pa tres luna máksimo manera sindikalismo a premirá ta bai ta muchu kòrtiku. Na Hulanda e ta mas largu. CBS a mustra ku hopi trahadó nan salario ta sueldo mínimo òf rondó di esaki, speshalmente den turismo, konstrukshon. Empresanan di seguridat i empresanan di limpiesa ri komersio po detal, manera entre otro supermerkadonan i  pakusnan.  E preshon riba salarionan i kondishonnan laboral ta oumentá. Nos lo mira ku empresanan ku no tin sindikato no ta duna oumento salarial, méntras ku e trahadó ta eksperenshá ku su forsa di kompra ta baha. Den un palabra pobresa ta bolbe hasi su entrada na Boneiru. Pa falta di maneho stabil nos ta bai konfrontá problema den sektornan krusial manera kuido, enseñansa i tègnik. Un krisis gubernamental ta hasi hopi difisil pa atendé ku e defisiensianan aki den un forma struktural. Pues nos representantenan pa falta di madures ta hunga ku kandela. No balotá e daño ku boso ta kousa na nos ekonomia i na nos merkado laboral. Boso ta okashoná ku tantu invershonistanan lokal komo internashonal ta pèrdè konfiansa den Boneiru. Boso ta kreando pobresa riba e isla i un situashon sosial no saludabel. Reflekshoná i sa ku sindikalismo lo konsiderá pa mobilisá pa defendé i protehá e klase trahadó i su famia. I meskos ku sindikalismo a hasiele huntu ku sektor empresarial, meskos sindikalismo lo drenta den diálogo ku su partnernan pa evaluá e situashon i tuma posishon. Sindikalismo no por para na banda i mira kuantu daño e krisis gubernamental aki ta kousando. I na trahadónan den e sektornan vulnerabel, esta turismo, konstrukshon, supermerkadonan i pakusnan, sektor di seguridat i limpiesa. bosnan ta bou di menasa serio. Laga esaki por ta un motivashon pa boso realisá ku boso mester organisá boso den un sindikato. E lema pa reflekshoná den e konteksto aki ta; Ora ku un krisis gubernamental presentá e klase trahadó i su famia ta un forsa fuerte pa unidat i resilensia. Ku e forsa aki nos por defendé i protehá nos seguridat di eksistensia i seguridat di trabou.