RESULTADO FINANSIERO DI NIVEL HISTÓRIKO I INTRODUKSHON EKSITOSO DI FLORIN KARIBENSE

WILLEMSTAD/PHILIPSBURG —Centrale Bank van Curaçao en Sint Maarten (CBCS) a publiká su Relato Anual 2025, reflehando un aña importante, marká pa un ganashi sin presedente di aproksimadamente Cg 66,9 mion i e introdukshon históriko di florin karibense na Kòrsou i Sint Maarten dia 31 di mart.

Aña 2025 a sera ku un ganashi di Cg 20,3 mion mas ku na 2024. Por atribuí e oumento akí pa gran parti na e strategia aktivo di maneho di invershon ku Banko a hiba. E oumento den entrada for di invershon a kompensá ampliamente e bahada den entrada neto di interes. Na su turno, e entrada neto di interes a baha debí na un oumento den gastu di interes relashoná ku un subida den e nivel promedio di sertifikado di depósito ku ta den sirkulashon i un oumento den e interes pagá riba kuenta koriente. Gastu mas abou tambe a kontribuí na e ganashi mas haltu, prinsipalmente danki na un reserva pa kuentanan dudoso ku a bira liber despues ku a risibí pago di debe pendiente.

Fuera di e ganashi rekòrt menshoná, e introdukshon eksitoso di florin karibense tabata, sin duda, e logro ku mas a definí e aña tras di lomba. Introdukshon di florin karibense dia 31 di mart 2025 tabata e kulminashon eksitoso di un di e proyektonan mas grandi den historia di CBCS. Despues di vários aña di preparashon minusioso, e transishon a transkurí sin difikultat, danki na un kooperashon estrecho entre CBCS, e bankonan komersial, ámbos gobièrnu, e komersiantenan i demas partido enbolbí. Durante henter e transishon, e sistemanan di pago a keda plenamente operashonal. Asina, e moneda nobo a integrá rápidamente den ekonomia diario.

Tambe, Banko Sentral a logra adelanto importante riba tereno di maneho monetario, supervishon finansiero, modernisashon di e sistema di pago, stabilidat finansiero i di su propio desaroyo institushonal. Durante henter 2025, maneho monetario a sigui enfoká primeramente riba stabilidat di e tasa di kambio fiho i mantenshon di un nivel adekuá di nos reserva di divisa. CBCS a sigui mehorá su kuadro di supervishon dor di sigui hisa nivel di su supervishon di AML/CFT/CFP basá riba riesgo,

sigui kumpli ku e normanan regulatorio internashonal i amplia su instrumentonan di monitoreo makroprudensial pa por identifiká i mitigá riesgo sistémiko na un manera mas efektivo. E Sistema di Garantia di Depósito a drenta na vigor na Kòrsou, miéntras ku e preparashonnan pa implementá e sistema akí na Sint Maarten a sigui. Tambe, CBCS a sigui dal paso pa modernisá sistema di pago, adoptando e normanan ISO 20022 i pa kontinuamente desaroyá e aplikashon di Instant Payments.

Fuera di esei, 2025 a marka e kulminashon eksitoso di CBCS su Plan Stratégiko 2022–2025. CBCS a lansa mas dashboard statístiko interaktivo, a kompletá un evaluashon stratégiko di sektor finansiero, a desaroyá un roadmap nobo di IT i a partisipá na Central Bank Transparency Code Review di IMF. E logronan akí a sirbi komo fundeshi pa e Plan Stratégiko nobo pa 2026–2028, un plan formulá a base di e vishon ‘Impulsá pa inovashon i enfoká riba konfiansa’. E strategia pa 2026–2028 lo guia e esfuersonan di CBCS pa bira un banko sentral ku ta operá kompletamente digital i basá riba data.

E Relato Anual 2025 ta disponibel riba nos wèpsait na: https://www.centralbank.cw/publications/annual-report/2025.

FUENTE:CENTRALE BANK VAN CURACAO EN SINT MAARTEN/LIVE99FM