SÜRNAM: HEFENAN DI POLIS DEN KARIBE A SKOHE HEFE DI POLIS CARL JOHN KOMO PRESIDENTE NOBO DI ACCP

PARAMARIBO – Hefe di polis Carl John di Sint Maarten a keda skohé komo presidente di ACCP. Esaki a sosodé durante di 40th Annual General Meeting and Conference di Association of Caribbean Commissioners of Police (ACCP), ku a tuma lugá di 11 te ku 15 di mei 2026 na Royal Torarica Hotel na Paramaribo, Sürnam. Hefe di polis John tabata promé vice-presidente di e organisashon for di 2025 i awor e ta reemplasá e presidente saliente.

E elekshon di hefe di polis John komo presidente di ACCP ta fortifiká mas ainda e posishon di e parti Karibe di Reino Hulandes den e struktura regional di polis i seguridat. Komo presidente, e lo hunga un ròl importante den koperashon entre e kuerponan di polis den e region i den e desaroyo di inisiativa di seguridat komun.

Pa hefe di polis John e elekshon a yega kompletamente inesperá. Den ACCP, kandidatonan no por nominá nan mes. Kandidatonan ta keda proponé for di e grupo. E elekshon ta demonstrá e konfiansa ku e region tin den su persona. ACCP ta e organisashon di koperashon di hefenan di polis den Karibe for di 1987 i ta reuni mas ku binti pais i teritorio. E tema di e konferensia e aña aki tabata: “Organized Crime: Implications for Regional Development”.

Loke tabata sentral den e konferensia tabata e influensia di kriminalidat organisá riba seguridat, ekonomia i desaroyo sosial. A papia ampliamente tokante kon violensia ku arma di kandela, tráfiko di droga, kontrabanda, krimen sibernétiko i retnan di krimen organisá ta mara kada biaha mas na otro den e region. Intelligence, teknologia i A.I. tambe a forma parti di e programa. Tur kuater hefenan di polis den e parti Karibe di Reino Hulandes a partisipá na e konferensia. Kolegio di Hefenan di Polis a duna vários presentashon.

Un di e presentashonnan tabata tokante “The Role of Crime Analysts in Assisting Law Enforcement in Combatting Crime in the Region”. Durante e presentashon a papia tokante e rol kresiente di intelligence i análisis den trabou di polis. Analistanan ta kontribuí na hasi retnan kriminal, ruta di arma i relashonnan transfronteriso mas visibel. Tambe a splika kon violensia ku arma di kandela, kriminalidat di droga i gangs ta bira kada biaha mas mará na otro i pakiko interkambio regional di informashon i análisis komun ta nesesario.

A presentá informashon tokante e Regional Network Meeting for Analysts (RNA) i e di kuater edishon di e reunion aki. RNA a bira den e último añanan un plataforma regional kaminda analistanan di Karibe ta kompartí konosementu i ta koperá riba asunto di seguridat regional. Durante e presentashon a anunsiá ku e di kuater edishon di RNA probablemente lo tuma lugá di 24 te 26 di novèmber 2026 na Medellín, Colombia. E tema lo ta: “Guns-Drugs-Gangs Nexus & Innovation”.

Tambe a presentá e proyekto “Fortifikashon di resilensia di polisnan den region Karibe”, ku ta ser desaroyá huntu ku EL PAcCTO 2.0. EL PAcCTO 2.0 ta un programa di koperashon i fortifikashon di kapasidat di Union Europeo ku Latinoamérika i Karibe, dirigí riba fortifikashon di institushonnan di hustisia i seguridat i kombate di kriminalidat organisá transfronteriso. Den e periodo ku ta bin, lo tuma lugá un inventarisashon regional di inisiativa i nesesidatnan eksistente den e kuerponan di polis den Karibe.

FUENTE: HEFENAN DI POLIS/LIVE99FM