SEMII MARTEN DEN STUDIO KU E.O GRAMMY NOMINEE ARTISTA VAKERÓ.

Kralendijk,- Semii Marten ta moviendo un bes mas den e área internashonal. Despues di un deskanso den kua el a lansa e piesa  ‘Hal’é’ i tambe el a move den e ambiente krioyo di Dia di Rincon ku Foyan Boys, awor e parti internashonal ta sigui.

Semii a risibí un invitashon pa bolbe bai Santo Domingo pa asina hasi algun grabashon den studio. E biaha akí Semii a drenta studio ku tres diferente artista dominikano internashonal i ta pendiente pa un mas den fin di siman. Un di nan ta Vakeró konosí komo: ‘El cantante de los raperos’ kende ta un ‘rapper’ ku tin hopi aña den músika ku diferente hit internashonal. Nan ta konsiderá Vakeró ya komo un leyenda na Santo Domingo. 

E artista akí ta un nominado di Latin Grammy i a yega di gana e premio prestigioso ‘Premio Soberano’ vários bes. 

 Un remarke ku Semii a risibí di algun  persona  na Sto. Domingo ta: ‘Bo ta hopi bendishoná, pasobra Vakeró ta un ‘rapper’ ku no ta saka kansion den kolaborashon ku otro kantante fásil i ménos ku un kantante ku ta ‘upcoming’. Awèl den e kaso akí ya Semii ta kushinando un kansion spañó den kolaborashon ku Vakeró. E grabashon den studio a bai hopi ameno i Vakeró a keda super impreshoná ku Semii su abilidat di kanto i tambe kon Semii por yega ‘on the spot’ graba kualke kansion, ku kambio i adaptashon ku nan pidi. 

Riba mesun dia Semii a graba den studio huntu ku un di e artistanan tambe hopi popular di merengue ku ta Silvio Mora ku tambe tin diferente hit di merengue internashonal. Otro kantante ku Semii a graba kuné tambe ta Rafely Rosario ku ta subrino di e konosido merenguero Toño Rosario. Rafely tambe ta otro artista mas ku tambe ta hopi pegá i konosí den e género latino. Tin mas grabashon pendiente ku artistanan konosí den e mundo latino, ku lo anunsiá despues.

Den lapso di tempu di algun ora, Semii a logra graba diferente  kansion nobo.

Semii ta sigui move, sigui dal stapnan grandi i sigui forma konekshon  internashonal. 

Fin di luna Semii lo tin algun presentashon tambe na Santo Domingo i entrevista na diferente media di komunikashon mas.

FUENTE: EDI CAROLINA/LIVE99FM