DESDE 10-10-10 BONEIRU TA FORMA PARTI INTEGRAL DI ULANDA SU STRUKTURA ESTATAL DEN FORMA DI UN ENTIDAT PÚBLIKO.

Kralendijk,- Na 2017 a pone Boneiru den konstitushon ulandes i a agregá artikulo 132 a pa asina krea e posibilidat pa diferenshá den regla- i leinan ku pa motibunan opvio i ophetivo no por keda apliká igual riba Boneiru.

Pues un desigualdat den igualdat. Artikulo 1 di nos konstitushon ta suprayá komo derecho fundamental humano rekonosé internashonalmente den Deklarashon Universal di Derechonan Humano e prinsipio di igualdat. Sindikalismo mester tuma nota ku e derecho laboral den Ulanda Caribense ta diferenshá riba hopi punto for di e derecho laboral den Ulanda Oropeo i komo tal ta konsiderá esaki un violashon di artíkulo 1.

Defensor di Pueblo, Kordinador anti-deskriminashon, kolegio di derechonan humano i Sindikalismo pa loke ta derechonan humano ta papia ku un bos, esta kumpli  i no di kumpli o splika.

Esaki ta nifiká ku en prinsipio tur lei i reglanan laboral mester ta igual den tur dos parti. Komo tal nos mester drecha supervishon i mantenshon di kumplimentu di e lei- i reglanan aki.

Pa esaki e departamentu indiká ta departmentu di inspekshon laboral di e ministerio di asuntunan sosial i laboral, SZW.

E supervishon i mantenshon aki lo kuminsá na krea un merkado laboral den balansa i ta mengua e abuso i eksplotashonnan di e trahadó pa falta di konosementu i pa falta di no ta organisá kolektivamente den un sindikato.

Na mes momentu ministerio mester bin ku mehorashonnan purá pa loke ta trata labor riba yamada(oproepkracht), labor basá riba “uitzendbureau” i otronan. Speshal atenshon mester pone riba e desigualdat grandi den kondishonnan laboral, mester promové kontraktonan kolektivo pa mihó protekshon pa e trahadó i atendé ku e kompensashon relashoná ku e lei di retiro.

Si pone e loke a keda deskribí komo ehèmpelnan di e desigualdat den lei- i reglanan laboral ku ta eksistí entre Ulanda Caribense i Ulanda Oropeo, siendo ku nos ta kai bou di e mesun konstitushon, e mesun Parlamentu i e mesun Gobièrno Nashonal, antó esaki ta bolbe ilustrá e balor ku konmemorashon di Dia di Labor riba 1 di mei tin.

Banda di su balor históriko ku ta enfatisá solidaridat di e klase trahadó, e ta rekordá nos e viktorianan sosial ku danki na akshonnan kolektivo sindikal a keda lográ.

Awendia 1 di mei no ta solamente un momento di rekordá, pero e ta tambe un dia pa pone atenshon na temanan laboral  aktual, manera Derechonan Laboral i Protekshon Sosial.

Mester respetá i rekonosé derechonan humano riba flur di trabou, mester rekompensá e trahadó ku un salario husto ku ta tene kuenta ku su forsa di kompra i oportunidat di krese i desaroyá individualmente i mester krea un ambiente di trabou sigur i saludabel.

Dia di Labor ta krea e plataforma di solidaridat entre trahadónan.  E ta demonstrá ku akshonnan kolektivo laboral ketu bai tin un impakto riba e desaroyo sosial ekonómiko. E ta lanta e konsenshi di desigualdat sosial i ekonómiko entre nos den Caribe i nos kompañeronan den Oropa i ta stimulá nos pa ban hasi un eskoho konsiente pa lucha pa IGUALDAT i kibra ku e kadena di desigualdat i deskriminashon ku tin nos preso ketu bai. I ku sindikalismo ku akshonnan kolektivo por logra esei a keda demonstrá 12 di mei 2024 ora ku masalmente nos a tene un demonstrashon pasífiko i eksigí igualdat riba e tereno di e sistema sosial, esta ònderstant, penshun di behes, di viuda i di huérfano, kompensashon pa mucha i oumentu hustifiká di sueldo mínimo.

Finalmente selebrashon di 1 di mei Dia di Labor tin un balor simbóliko, ya ku e ta marka un momento di solidarismo nashonal i internashonal, kaminda trahadónan riba henter mundo ta rekordá e lucha pa hustisia.

Pues nos por konkluí ku ta realmente un deber di sindikalismo pa konmemorá 1 di mei komo Dia internashonal di Labor i realisá ku apesar ku sierto kondishonnan di trabou a mehorá, e lucha ta kontinuá pa primeramente mantené loke a logra pero tambe pa fortifiká i prepará e klase trahadó pa retonan di futuro.

Pa 1 di mei próksimo mi mensahe na e klase trahadó ta:

“1 di Mei 2026: Huntu nos ta fuerte, Huntu nos ta bai dilanti – Ban selebrá e forsa di Labor!”

FUENTE: NORWIN NÒCHI WILLEM

.