ANIMAL POLITICO

Kralendijk,- Den estudio di historia tin e parti di polítika ku ta referí na e parti sosial i funshonamentu di e miembro den e komunidat.

Den e diskushonnan ku ta tuma lugá tokante solushon di e krísis gubernamental mi ta ripará ku ta trata di hasi kos no igual, bira igual ku ta e forma mas teribel di igualdat.

Mi pregunta ta. Si ta pasobra tin tres frakshon ta lógiko ku kada frakshon tin ku haña un diputado? Esaki ta un igualdat teribel no preferibel.

E situashon aktual ta ku tantu señora Serberie komo señor Vrolijk no tin un organisashon polítiko for di kua por apuntá un persona ku idiologia di e partido pa ta diputado den un koalishon nobo ku MPB i UPB. Prueba ta ku señor Vrolijk a apuntá un miembro di DP pa bira su diputado.

Pa DP e kos aki ta bon pero e kos aki no ta kuadra ni ku étika ni ku lógika. Laga nos pensa kiko e krachinan lo a bisa si señor Vrolijk a proponé Joselito Statia pa ta su diputado. Na momentu ku frakshonnan M21 i Vrolijk a ripará ku tin un kos no igual a trata na hasi e kos igual ku e konsekuensia teribel di sakrifiká dos diputado hende muhé, ku na mi opinion ta diskriminashon i asta rasista pa pone dos hende hòmber komo diputado.

Den un koalishon ke e frakshonnan; Serberie, MPB i UPB no por aseptá diputado Weber ku ta di M2. Esaki ta kontaminashon polítika. No lubidá ku e miembronan di MPB i UPB tur tabata diputado pues di mes ke nan hende pa ta diputado.

E koalishon nobo mester sali for di oposishon ku ta sinku konsehal i no lubidá ku Salma a bisa ku e ta bai den oposishon. Tur eksperto por rabia pero pa bienestar di polítika i maneho di Bonaire e repartishon mester ta: Direktorado di Komunidat i Kuido i  Direktorado di Maneho i Sosten pa UPB i pa MPB Direktorado di Planifikashon i Desaroyo i direktorado di Supervishon i Mantenshon di lei. Frakshon Salma ta keda ku e yabi den konseho Insular pa a base di bon palabrashon kontrolá di bèrdat Kolegio Ehekutivo.

Mi ta spera ku e diputadonan mester ta apresiá pa pueblo i no ko’i loko ku yama baké ku ta nifiká: Pa sèn nos ta laga diabel balia. E dicho ta: “Si plaka pasa kabai, baké ta karga sia na lomba” Na ingles yen’e “Money talks…..”

FUENTE: ARTHUR SEALY