E AÑA AKI NOS A MUSTRA RIBA E BALOR I IMPORTANSIA DI BON KOMUNIKASHON RIBA FLUR DI TRABOU PA STIMULÁ MOTIVASHON, PRODUKTIVDAT I BON AMBIENTE.

Kralendijk,- Awe nos ta sigui ku e siklo aki pa komo sindikalismo duna nos aporte pa sigui krea un merkado laboral positivo riba Boneiru.

E rèspèt i rekonosimentu ku sindikalismo a gana di ta un partner igual na mesa di diálogo pa karga e desaroyo sosial ekonómiko duradero i sostenibel di Boneiru ta eksigí ku e trahadó ta konsiente di su obligashonnan pa loke ta su konvenio di trabou, pero alabes tambe konsiente di su derechonan legal i alabes esnan den CAO ku e tin. Huntu ku esaki sindikalismo huntu ku e dunadó di trabou mester sigui traha huntu pa krea e ambiente di trabou sigur i saludabel pa alsa produktividat i krea espasio pa desaroyo personal di kada trahadó.

Un punto ku den e kuadro aki meresé atenshon ta e abilidat pa aktua pro-aktivo pa evitá konflikto entre trahadónan i promové un kultura di rèspèt i koperashon.

Konfliktonan entre trahadónan i sigur konfliktonan en general riba flur di trabou no solushoná ta krea un ambiente di trabou di tenshon i desagradabel.

Un biaha mas den esaki, sindikalismo kier mustra riba e importansia di nos shòpstewardnan, e wesu di lomba sindikal riba flur di trabou. Sindikalismo kontinuamente mester sigui forma su shopstewardnan ku diferente entrenamentu.

Den e kaso aki mester perkurá pa e shopstewardnan ta disponé di abilidatnan pa solushoná konfliktonan na un manera konstruktivo.

Mester stimulá relashonnan positivo interpersonal dor di organisá aktividatnan den ekipo i eventonan sosial pa reforsá e relashon entre e trahadónan.

Esaki lo yuda den konstruí konfiansa i baha e negativismo. Trabou i traha mester bira un plaser i no un kastigu. Kada trahadó mester bai trabou ku amor, pasobra e ta bai kumpli ku un deber sagrado di kontribuí na desaroyo di su pais, na su propio desaroyo i e ta hasi esaki pasobra e sa ku ta respeté komo persona, ta rekonosé i baloré komo hende i ta rekompensé hustu pa e por kria su mes i su famia den un forma desente.

E meta mester ta pa huntu nos krea un ambiente di trabou kaminda e trahadó por traha sigur i ku rèspèt. P’esei sindikalismo den su negosashonnan pa kontratonan kolektivo semper ta inkorprorá pa tin maneho i prosedura ku ta promové un kultura na trabou di rèspèt i inklusividat.

Mester tin normanan di komportashon ku e meta ku tur trahadó ta sinti ku nan tin sosten i ku nan ta sinti nan respetá. E kòdigo di komportashon ta parti integral den negosashon pa CAO-nan. Esaki sigur ta un punto fudnamental ku a lanta USIBO pa asina sindikalismo en general na Boneiru i no individualmente krea e maneho sindikal aki. Lástimamente ainda tin liderato sindikal ku ketu bai no kier pasa riba nan sombra d individualismo i drenta den e sirkulo kaminda e arma prinsipal di sindikalismo ta UNION.

Nos a bolbe tuma nota di un kaso den korte den kual a sali na kla ku tin hopi abuso i eksplotashon riba nos merkado laboral, speshalmente pa ku trahadónan imigrante. Esaki abogado mr. dr. Anthony Nicolaas a trese dilanti. Sr. Nicolaas por sierto a dediká su tésis pa doktorá na e tópiko aki.

Remarkabel si ta ku e abusonan aki ta tuma lugá den e merkado i sektornan laboral ku no ta organisá. Sr. Nicolaas a trese dilanti ku na su opinion sindikalismo ta hasi muchu poko pa atraé e trahadónan imigrante pa bira miembro.

Komo konsehero di USIBO lo mi bin mas amplio i mas spesífiko riba e tema aki pa asina kompartí ku e ponensia di sr. Nicolaas tin un base, pero ku e otro banda di medaya ta ku mester pone e responsabilidat tambe riba e trahadó/imigrante mes ku ta tiki te nada konsiente di su derecho fundamental rekonosé internashonalmente, esta e derecho di afiliá i hasta lanta su propio organisashon sindikal.

Sindikalismo, spesifikamente USIBO  ta promoviendo kultura di kurashi. No ta por nada ku USIBO a instituí e YABI DI KURASHI  komo un símbolo pa e trahadónan ku ta logra surpasá e sombra di miedu i hasta kisas ku konsekuensia negativo pa nan sirbi komo modelo pa nan koleganan i mustra ku miedo ta e konsehero mas malu di hende.

Ningun  trahadó mester koperá pa entrodusí sklabitut moderno. I e arma di e trahadó pa esaki no ta violensha sino UNION SINDIKAL. E moral pa e situashon aki ta

“Kurashi no ta ousensia di miedu, pero e ta e viktoria di e trahadó riba esaki. E hòmber/muhé balente no ta esun ku no ta sinti miedu , pero esun ku ta konkistá miedu. E ta esun viktorioso.”

FUENTE: NORWIN NÒCHI WILLEM/LIVE99FM