DIA 21 DI NOVÈMBER ÚLTIMO, USIBO A PARTISIPÁ NA UN KONGRESO ORGANISÁ PA FNV NETWERK KONINKRIJKSRELATIE.

Kraledijk,- Riba invitashon di Sra. Zamaney Menso i komishon di FNV Netwerk Koninkrijksrelatie, USIBO a haña invitashon pa partisipá na e reunion importante aki.

USIBO tabata tin un delegashon di 4 persona ku a partisipá na e reunion aki, Catharina van Manen tabata presente físikamente na Hulanda i na Boneiru via di e sistema  Hybride vergadering, tabata presente Cherel Kwidama, Naidy Cicilia i konsehero Norwin Willem.

E programa a kuminsá 13:00 di atardi ora di Hulanda, kual ta 08.00 ora di Boneiru i riba e programa aki tabata tin 2 punto hopi importante pa islanan den reino, a trata  e plan di proyekto “ partnerships / samenwerking met de BES – Eilanden, Aruba en Sint – Maarten” i “Wat hebben onze mensen nodig?”

FNV a trata e dos puntonan aki manera traha huntu i kiko e hendenan na e islanan den Caribe Hulandes mester pa por sigui hisa e kalidat den sindikalismo.

Na mesa a kompartí diferente ideanan i konosementu kon pa por organisá aktividat nan na Hulanda i tambe na e islanan.

Sr. Edwin  Rustenberg ku ta aktivo den e red di suidadano Global i miembro di parlamentario di FNV a duna su eksperensia i ehèmpel nan kon a logra esaki pa ku Sürnam i ta boga pa trahamentu huntu mas amplio.

USIBO ta mira bek riba un reunion hopi konstruktivo i satisfaktorio.

USIBO ta kontinuá ku e proyekto aki konhuntamente ku FNV i e departamentu di Netwerk Koninkrijksrelatie i den USIBO nos tin un komishon ku netamente ta enkargá ku formashon, kual komishon huntu ku direktiva lo sigui kanalisá e proyekto aki.

Huntu nos lo logra mas pa e klase trahadó na Boneiru, USIBO ta kere ku ta huntu nos tin ku hasi esaki i ku yudansa di entre otroFNV nos por logra hopi mas.

FUENTE: USIBO/LIVE99FM