KU BENEPLÁSITO POR A TUMA NOTA DI E ANUNSIO DI REORGANISASHON DI USIBO I A YENA KU SATISFAKSHON DI LESA I MIRA KARANAN DI UN GENERASHON NOBO DEN E ORGANISASHON MADRE DI SINDIKALISMO NA BONEIRU.

Kralendijk,- Un idea ku a kristalisá ku 6 sindikato na aña 2012 pa asina duna bida bèk na sindikalismo na Boneiru,

pero mas ku tur kos pa duna e klase trahadó un bos den e desaroyo sosial ekonómiko nobo ku Boneiru lo a bai enfrentá despues di kambionan drástiko di nos struktura estatal na 2010 kaminda a desmantelá Antia i Boneiru a opta pa tin laso direktamente ku Ulanda, pues lo a bai kai direktamente tambe bou di e influensha di Ulanda Oropeo. Un invashon di invershonistanan djafó speshalmente for di Ulanda pa e klima atraktivo ku a krea pa empresanan bin establesé aki. Antó ta aki e vishon sindikal a funshoná pa konvensé e 6 sindikatonan di e tempu ei pa bin huntu i asina krea e balansa di poder riba e merkado laboral aki na Boneiru.

I por bisa ku orguyo ku a logra pa formalisá un plataforma ofishal den kual tres partner sintá na mesa a base di igualdat pa duna kada un nan aporte pa krea un desaroyo sosial ekonómiko i ekológiko duradero i sostenibel pa nos isla di Boneiru.

E kompromiso aki a keda seyá 15 di novèmber 2018 na final di un konferensha di Mesa Rondó den Mariott Hotel, na unda tur e partidonan a firma un protokòl i un reglamentu pa e Diálogo Sentral den e asina yamá Akuerdo di Saliña. E importansia di USIBO den e Diálogo Sentral ta evidente. Miéntras e sektor empresarial ta primi pa logra mas benefisio i inisiativanan pa nan negoshinan floresé. USIBO kontinuamente mester mustra ku e desaroyo aki no ta kargá so pa e aspekto finansiero, sino e ta kargá pa un gran parti dor di e aspekto humano.

I den esaki no ta laga ningun momento pasa sin mustra riba e tres R-nan,  esta Rèspèt pa e ser humano ku su derecho riba un trabou digno bou di sirkumstansianan saludabel i sigur, Rekonosementu, esta rekonosé ku e trahadó ta úniko, e ta parti esenshal di e kompania i/o instituto, e mester tin partisipashon den maneho te asina leu ku ta toké i finalmente Rekompensa, esta ku su kondishonnan laboral tantu primario komo sekundario ta di akuerdo ku su kapasidat i prestashon na trabou. No mester lubidá tambe ku USIBO su ròl den e Diálogo Sentral ta tambe pa analisá i evaluá nos leinan laboral tantu den nos Kódigo Sivil,

komo den nos Derecho Laboral 2000 i otro lei- reglanan i ordenansanan den  kual ta regla legalmente derecho i obligashon di e trahadó. Ta nos deber di tene gobièrnunan tantu lokal komo nashonal lantá i alerta pa mantené e igualdat den trato di e trahadó riba flur di trabou. Den un otro edishon lo bin ku e logronan signifikante di USIBO desde su eksistensia i mas aun desde su partisipashon den e Diálogo

Sentral. Loke si ta di lamentá ta ku ainda tin lidernan sindikal ku no ta realisá e importansia di e UNION aki, om UNION ku apsolutamente no ta pa sirbi e interesnan di e liderato sino pa sirbi interesnan di e klase trahadó i nan famia.

Por bisa trankil ku pa falta di e UNION aki ainda tin desigualdat grandi tantu lokal komo den relashon ku Ulanda riba nos merkado laboral. P’esei riba petishon i insistensia di USIBO a kaba di sali dos rapòrt di parti di ministerio di asuntunan sosial i di labor ku ta hasi un komparashon entre nos sistema di seguridat sosial i esun di Ulanda Oropeo i un rapòrt ku ta indiká e diferenshanan entre nos leinan laboral i esnan den Ulanda Oropeo. Pues den tempu benidero USIBO tin hopi trabou pa realisá na fabor di e klase trahadó i lo ta importante pa konsiderá  pa organisá un kongreso  di sindikalismo di e 6 islanan. Huntu na un mesa rondó por traha ku un meta, esta eliminá desigualdat ku ta eksistí den e klase trahadó riba nivel di Reino.

I den esaki USIBO mester tuma e liderato. E ta un idea ku lo por realisá pa ku selebrashon di 1 di mei 2026. Nos lo por basta nos ke.

FUENTE:NÒCHI WILLEM/LIVE99FM