AÑA TA YAMANDO AYÓ I YA FIESTA A KUMINSÁ KU DÒRNAMENTU DI KAYA I PLENCHI SIN LUBIDÁ E REGALONAN DEN ÁREA DI SANTA CLARA.

Kralendijk,- Tantu konsehal Thielman komo diputado ta pidi gezaghèber pa hasi investigashon. Ta bini investigashon pa sa ki dia, ken, kon, na ki momentu desishon den kaso di Santa Clara a tuma lugá.

Si tin sospecho ku algu a bai for di regla i prosedimentu legal ta lógiko ku ta kuminsá ku hasi pregunta i tambe pidi pa hasi investigashon. Diputado Abraham ta kulpa konsehal Thielman di a bai públikamente ku e kumpra di tereno di un tio di diputado Abraham.

Diputado Abraham no tin nada di konsehá konsehal Thielman, al kontrario ta konsehal ta kontrolá diputado i diputado Abraham sa esei bon bon pues no hunga tòf. Diputado Abraham ta rabiá pa motibu ku segun e, otronan ku tin mal nòmber ta purba daña su nòmber.

Awèl e dicho pa diputado Abraham ta; si e ta liber di piká i tin bon nòmber e tira e promé piedra i no tuma otro hende hasi. E investigashon por konkluí ku henter e asuntunan di tereno na Santa Clara tabata un gran pantomina òf ku a falta ku reglanan di bon gobernashon.

Den tur dos konklushon ta bon pa nos siña for di Santa Clara. Gobernashon DP,M21 i frakshon Vrolijk no ta produsiendo ku no ta tira falta riba otro. Nos tur sa di problemanan na Selibon, Lènfil, ku kambio di klima, bibienda pagabel, transporte públiko, lugá pa parker den siudat, edifisionan di gobièrnu manera kantor di BC i LTS bieu, Saliña Vlijt unda a gasta bòshi Plaka.

Por sigui menshoná pero tira falta riba e gobièrnunan anterior no ta resolvé niun problema. Parse ku nos gusta alabá pasado, bira líriko i gosa e trabou malu di otro, pero no ke drecha e situashon ku nos ta den. 

FUENTE: ARTHUR SEALY