HUBENTUT NA MARCHA

Kralendijk,- Na Bonaire Konseho Insular no ta organisá nada relashoná ku e kambio estatal. UPB ta bai reflekshoná riba e último 15 aña den Reino. Tin 5 oradó e anochi ei.

Di sr Willem Cicilia i sr Mike Eman por spera kandela polítiko tokante 15 aña, OLB òf munisipio i 39 aña. País Aruba. Di Yolinda Craane lo ta interesante pa sa su berdadero aspirashon polítiko i di e dos hóbennan ta fasinante pa tende kon nan ta mira futuro.

Mi ta di opinion ku ta e hóbennan mes mester disidí riba futuro di Bonaire, aunke bieunan ta keda pretendé ku ta hasi kos pa futuro generashon. Si polítikonan ta bisa ku Hulanda ta disidí pa nan, sin nan, awèl no disidí pa hóbennan sin nan.

Esnan nasé for di 2000 ta bon nan altura di e desaster ku nos bieunan a okashoná. Bieunan ke hinka hubentut den un direkshon sin puntra ku ta e direkshon ei hubentut ke bai. Un tendensia spantoso ta ku ke frena uso di media sosial pa hóbennan bou di 15 aña.

Dikon no ta frena e bagamunderianan di e bieunan riba media sosial kargá ku zundramentu, atake personal, redashi, tiramentu di falta i defendé kos robes hasiendo mal uso di libertat di ekspreshon. Prueba di esaki ta komentario di solamente bieunan riba e ponensia profundo:

“Si 9 di 10 hende bisa ku bo no ta funshoná bon i ku bo ta buska guera ku tur hende bo no ta para ketu pensa?” Mi ta sigur ku e polítikonan nobo manera; Nina, Angelica, Yolinda, Hennyson ta bai kibra ku e pretenshon antikuá di e bieunan, pasobra mi ta kere den nan; akshon, impakto, kompashon,

koresponsabilidat, no-nonsense i pèrseveransia. Bieunan keda disfrutá di boso masturbashon mental i laga hóbennan mes konstruí e Bonaire ku pa nan ta esun ideal. “Chubatu bieu bai drumi un banda ta lamchi moda ta manda awor”.

FUENTE:ARTHUR SEALY