PENALIDAT DISPROPORSHONAL PA E ASINA YAMÁ ‘BURAKU DI ESTADIA’

Kralendijk,- Fundashon Union di Imigrantenan Boneriano (FUIB) a indiká den pasado kaba ku e penalidat pa un asina yamá ‘buraku di estadia’ (Hulandes: ‘verblijfsgat’) ta klaramente disproporshonal.

Den nos sistema di gobernashon y den derecho penal, e prinsipio di proporshonalidat ta hopi importante. Kualkier desishon di gobièrnu mester kuadra ku ‘prinsipionan general di hustisia’. E prinsipio di proporshonalidat ta un di e prinsipionan general di hustisia aki.

A base di art. 9 di Lei tokante Hurisdikshon Atministrativo, Korte por husga si un desishon di gobièrnu ta kuadra ku prinsipionan general di hustisia, sí of no. Si Korte ta husga ku un desishon di gobièrnu NO ta kuadra ku un di e prinsipionan aki, Korte por anulá e desishon. 

Esei FUIB tin intenshon pa pidi Korte pa hasi. FUIB kier entamá un kaso kaminda un demandante ku tin mas ku 13 aña bibá na Boneriu kaba, te ainda no tin su pèrmit di estadia permanente. E motibu ta ku dos biaha e tabatin un asina yamá ‘buraku di estadia’, es desir algun dia of siman di estadia ilegal entre dos pèrmitnan konsekutivo. Hasta un solo dia di ilegalidat por kousa ku un imigrante tin ku warda 4 aña mas pa e por haña su pèrmit di estadia permanente.

Esei ta klaramente disproporshonal.

Promé ku bai Korte, FUIB lo pidi Ofisina di Imigrashon (IND) pa sinta na mesa pa wak si por yega na un solushon amikal pa e problema aki, ku ta perhudiká masha hopi imigrantenan ku pa diferente motibu a haña nan mes konfrontá ku algun dia, siman of luna di estadia ilegal (es desir ‘buraku di estadia’). FUIB no tin problema ku mester tin konsekuensia si un imigrante ta keda na Boneiru ilegal. Pero FUIB sí ta haña ku e kastigu pa un infrakshon chikitu mester ta proporshonal.  

Kualkier imigrante ku ta deseá di haña mas informashon presiso over di esaki of otro problema hurídiko por tuma kontakto ku Direktiva di FUIB (yama: 787 2373) of por pasa libremente na nos Konsultorio hurídiko grátis tur djasabra di 4’or te 6’or di atardi na Ofisina di Abog. Bijkerk na Antriol. Adrès: Kaya Jose G. Hernandez 16A. Telefòn y whatsapp: 796 2650.

 FUENTE: FUIB ABOG. M. BIJKERK