MI TA SKIRBI ALGU KON AMI A EKSPERENSIÁ MARY TJIN ASJOE I KI BALOR SU HERENISA TIN PA NOS.

Kralendijk,- Mary su herensia ta den su trabou di kuido informal, konosí komo “Mantelzorg”, primeramente pa su mama i ruman.

Riba mes dia di Mary su fayesementu tabatin un presentashon di un representante di Mantelzorg den reunion di komishon di Konseho Insular. E punto esensial tabata ku komunidat mester karga responsabilidat pa e tipo di kuido aki.

E gritu, ku nos mester hasi algu riba tereno di kuido informal ta bon pero e diferensia di Mary su sistema di kuido informal ta ku e a hasi un eskoho pa su embolbimentu sosial. Mary a reakshoná riba sirkunstansianan sabiendo ku e no por disidí riba e sirkunstansianan.

Su responsabilidat ta mará na e manera di hasi eskoho. Mary su personalidat nunka a laga espasio pa a pensa ku e sirkunstansia ku a aparesé tabata falta di otro. Su pregunta, esei mi sa a base di nos kòmbersashonnan, tabata na promé lugá:

”Ki mi ròl tabata den loke ku a pasa” i despues di kontestá e pregunta ei su di dos pregunta tabata: Ki mi mester hasi pa hasi e situashon mas kómodo” Mary su morto a pone ami rekordá tempu ku Willy Rowe di Barbados a biba hopi aña den Antriol.

Un persona siegu di edat avansá tabata biba independiente i tabata risibí ayudo di amigu i bisiña. Importante pa korda ku Buchi Statia i  Kris Martis  dos hóben di Antriol den añanan sesenta tabata kana ku Willy tur djasabra pasa serka hendenan konosí pa yuda Willy finansieramente.

E kuido informal di Mary no ta algu ku ami a tende pero ta loke mi a eksperensiá. Mary danki pa e regalo presioso ku bo a duna nos.

FUENTE: ARTHUR SEALY