E ARTISTA SEMII MARTEN TA SIGUI DESTAKÁ DEN  MUNDU ARTÍSTIKO

Kralendijk,- Despues di un presentashon eksitoso na Dia di Boneiru na Hulanda Semii Marten a sigui pa Bali-Indonesia. Na Hulanda el a presentá su komposishonnan kombiná ku parti krioyo. E tabata akompañá pa algun músiko di Boneiru i den kolaborashon ku Dash Music Center a sa di entrentené e públiko.

A base di kompilashon di material  di presentashon di Semii Marten, el a risibí invitashon ofisial di un promotor di un evento interkultural na karnaval di Bali.

Loke a hala nan atenshon ta e energia i vibra di su presentashonnan ku e toke afro-karibense i hopi importante uzando nos dushi idioma Papiamentu.

Na promé instante tabata pa 1 presentashon den un evento interkultural na final di karnaval di Bali, kaminda lo tin presentashon di diferente artista di diferente parti di mundu. Siendo aya el a haña 2 invitashon mas pa presentá. 

Banda di su shou  di kanto i baile, Semii a promové Boneiru i tambe laga nan sera konosí ku nos idioma, ku ta un parti esensial di nos kultura. Su shou ta konsistí di kantika urbano/afro-karibense pero tambe di un parti krioyo ku ekshibishon di bandera di Boneiru.

Huntu ku su koreógrafo Joey Veritas i algun baliadó talentoso di Indonesia el a sa di pone un presentashon úniko den otro, nunka bisto na Bali. Na momentu di emití e komunikado ya 2 tin presentashon tras di lomba den kua el a sa di kapta atenshon di su públiko spesialmente den e parti ku a inkorporá públiko den un simadan na final. El a haña hopi bin akogida i un apresio enorme pa un artista biniendo for di uni sla chikí. Den Blue Door Bali Event el a presentá huntu ku artistanan di Afrika Sur i Bali.

Pa e parti di interkambio kultural e tabatin kòmbersashon ku diferente bishitante i habitante di Bali tokante di Boneiru i el a laga nan eksperensiá uzo di nos idioma. Sorpresivamente niun no a yega di tende di Boneiru.

Na tabata hopi entusiasmá pa a tende algu di Boneiru i siña algun frase na Papiamentu. Un biahe eksitoso den kua e por a nètwèrk i sera konosí ku e.o. promotor- i diseñadónan famoso. Un danki ta bai na Gobièrnu di Boneiru ku a kere den dje komo artista pa por promové tantu Boneiru komo nos idioma Papiamentu na Bali-Indonesia. Keda pendiente pa e siguiente produkshon ku pronto ta na kaminda. Dia 8 di òktober lo e ta riba esenario na apertura di Regatta 2025.

Pa mas detaye di e biaha por sigui Semii Marten riba facebook òf instagram.

FUENTE: EDI CAROLINA/LIVE99FM