Redakshon
Kralendijk,- Manera ya ta konosí kaba, Bonaire Wolfpack Baseball Foundation(BWBF) tabata instrumental den kresementu di e deporte di beisbòl aki na Boneiru.
Dunando muchanan e oportunidat di sera konosí ku e deporte i tambe praktiká e deporte.
BWBF ta para pa mas tantu mucha hasi e deporte di beisbòl i asin’ei trata na tene e muchanan mas tantu posibel riba e kaminda positivo i alabes duna nan e oportunidat na esnan ku sufisiente talento, di por sea firma pa bira profeshonal òf tambe bira atleta studiante na kualke parti di mundu pero espesialmente Merka, kaminda e pelotero por bishitá su skol i alabes praktiká e deporte ku e stima na nivel mas haltu kual ta beisbòl.
Esaki por hasi tambe ku despues e pelotero aki por sigui pa nivelnan mas haltu òf despues ku su diploma den man bira un habitante ku su kapasidatnan pa kontribuí den komunidat boneriano.
Ku hopi orguyo BWBF, kier a anunsiá ku e pelotero Miguel Tobon, a bira e di kuater pelotero di e organisashon, ku a logra haña beka pa bira atleta studiante na Harrison Chilhowee Baptist TKA Academy na Seymour, Tennessee.
Miguel lo biaha diabierne aki pa Merka, p’asina e por establesé su mes i kuminsá ku su reto nobo eskolar pero tambe deportivo.
BWBF konhuntamente ku CEO58, ta hopi orguyoso ku nan di Kuater logro aki huntu i ta para habri ku e meta pa por juda tur hoben boneriano ku ta praktika e deporte di beisbol pa duna nan un oportunidat sin importa organisashon teniendo e hoben su futuru y desaroyo como e meta principal.
BWBF un biaha mas kier a gradisí CEO58 di Aruba pa nan intermediashon i ayudo den e kaso aki.
Un pabien tambe na Yerson Rosalina como su prome pelotero bou di su guia pa ku pitcheo ku ta logra un beka pa high school.
BWBF ta felisitá Miguel un biaha mas ku e logro aki i ta dese’é tur klase di éksito y perserverancia. Nos tin sigur ku e lo saka kara di Boneiru i BWBF durante su reto nobo.
FUENTE: BWBF/LIVE99FM
GIPHY App Key not set. Please check settings