DOS DIPUTADO A TUMA RETIRO I NO TA NESESARIO PA PUNTRA KIKO TA E MOTIBU(NAN), E SIGUIENTE PASO TA PA PASA PA ÓRDEN DI DIA.

Kralendijk,- Tampoko ta importante pa mira ken ta e diputadonan nobo i kibra kabes ku nan lo ta “profeshonal” Ami ta mira e tragedia di historia di maneho di polítika ku hóbennan den posishon komo miembro di Kolegio Ehekutivo i Konseho Insular.

Konta kuantu hóben,tantu profeshonal òf nò,  for di 1969 te 2025 no a logra komo diputado I/òf miembro di konseho insular. Ta hopi nan ta ku a drenta pa drecha kambia kos sin a tuma tempu pa analisá e struktura polítika di Bonaire ku ta bashá den “gewapend beton”

No ta fásil pa hóbennan komprondé  e struktura i na final nan ta bira víktima. Ta trata di poder kaminda e lider tin konosementu optimal di e struktura i sea e lider tin kapital òf no e ta haña aliado ku kapital pa logra benefisio ekonómiko i tene votadónan kontentu ku ta bira dependiente di e lider.

Duna hóben chèns den partido ta pa nan kumpli ku e lider òf nan ta somentá. Den e struktura “profeshonalismo” no ta konta.

Aki ta e sistema di “òmerta” ta konta ku e regla di oro ku bo ta obligá di obedesé e lider inkondishonal i tin ku keda ketu. Si bo hasi kos tras di su lomba bo tin ku bai. Serka dos “Profeshonal” den struktura di polítika di Bonaire ku ta mi mama Elisa i mi ruman Aubrey  mi a siña ku;

“Den kas di prostituta no tin señorita”. Awèl diputadonan nobo pensa bon promé ku hisa dos dede.

FUENTE: ARTHUR SEALY