A TOU VEHÍKULONAN MAL STASHONÁ RONDÓ DI HÒSPITAL

Notisia di polis di djaluna 2 di yüni te ku djabièrnè 6 di yüni 2025

Kòntròl di tráfiko planiá

Djaweps 5 di yüni, a tene un kòntròl di tráfiko planiá riba Kaya Korona en konekshon ku seguridat den tráfiko. Durante e kòntròl aki, a kontrolá un total di 20 vehíkulo di kua a duna 8 but.

E butnan tabata pa lo siguiente:
5x pa manehá sin reibeweis;
3x pa manehá sin seguro bálido.

KPCN ta hala atenshon di un i tur pa nan tin e dokumentunan nesesario, na òrdu. Tambe ta konsehá estriktamente pa kumpli ku e reglanan di Lei di Tráfiko. Den e dianan binidero, polis lo sigui tene e tipo di kòntròlnan aki.

Bo no ta kumpli ku reglanan? Bo por haña un but. E suma di un but pa e violashonnan menshoná ta varia entre $30 te ku $225.

A tou vehíkulonan mal stashoná rondó di hòspital

Kuerpo Polisial Hulanda Karibense (KPCN) tin algun tempu kaba ta risibí notifikashon di vehíkulonan mal stashoná rondó di hòspital na Boneiru. Hopi biaha ta stashoná vehíkulonan kaminda esaki no ta permití, manera riba asera, parada di bùs (‘bushalte’) i riba kaya.

Stashoná vehíkulo riba kaya ta kousa molèster den tráfiko regularmente. Esaki ta kambia kayanan di dos direkshon den un solo direkshon, lokual ta stroba vehíkulonan di pasa banda di otro. Esaki por tin konsekuensia tambe pa servisionan di emergensia, manera ambulans ku ta keda strobá. Esaki por retrasá e yegada na kasonan di emergensia.

Djaweps 5 di yüni den ora nan di mainta, polis a konstatá mas o ménos 15 vehíkulo mal stashoná den e área di hòspital. A tou algun di esakinan i doñonan di vehíkulo ku kier a kita nan outo na e momentu ei, mester a paga gastunan di ‘takelwagen’.

Stashoná riba asera, na sitionan ku no ta destiná pa stashoná vehíkulo òf na sitionan ku no ta permití, ta prohibí. Tipo di komportashon ora di stashoná asina ta kousa molèster pa otro usuarionan di tráfiko. Esaki ta stroba bista i ta oumentá situashonnan insigur den tráfiko.

Kuerpo Polisial Hulanda Karibense (KPCN) ta atvertí ku lo tou vehíkulonan mal stashoná den e área di

---

hòspital na sitionan ku no ta permití. Den e periodo benidero, polis lo sigui kontrolá regularmente i di forma estrikto. Personanan ku kometé violashon por haña un but di te ku $85, i por tou e vehíkulo mal stashoná. Gastunan di tou ta bini riba kuenta di e doño di e vehíkulo. Tuma bo responsabilidat komo usuario di tráfiko i kontribuí na un tráfiko seif.

Detenshon pa violashon Lei di Identifikashon

Djárason 4 di yüni, alrededor di 6.05 or di atardi, a detené un ménor di edat di 15 aña na Kaya Tapajos pa violashon di Lei di Identifikashon BES. E detenshon a tuma lugá despues ku un patruya a mira un skuter ku dos persona ariba i e pasahero no tabatin un hèlm bistí. E patruya a duna señal pa para pa unkòntròl. E pasahero a haña but pa kore riba un skuter sin helm bistí. E shofùr no tabatin reibeweis, e no por a mustra dokumentonan di seguro i no por a mustra un prueba di identifikashon tampoko. Pa esaki a detené i a hib’é warda di polis.

Detenshon pa ladronisia di outo

Djamars 3 di yüni, alrededor di 9.30 or di anochi, a detené un hòmber di inisial D.E.G.Q. di 26 aña di edat na Kaminda Lagun pa ladronisia. A detené e sospechoso despues ku probablemente el a hòrta un outo na Kaya Klafir den oranan di mardugá di djadumingu 1 di yüni. Mas lat riba e mesun dia, a haña e outo na Kaya Veronica. Ta investigando e kaso.

Aksidente

Djamars 3 di yüni, alrededor di 4 or di atardi, ‘meldkamer’ sentral a risibí notifikashon tokante un aksidente na Bona Bista. Pa motibunan ainda deskonosí, un a outo a dal den un kurá i un porta di entrada di un kas. Promé ku esei, e mesun vehíkulo a dal tambe den un trùk ku tabata stashoná. A trasportá e shofùr pa hòspital pa tratamentu médiko.

Detenshon pa manehá bou di influensia di alkohòl

Den oranan di anochi di djaluna 2 di yüni, a detené un hòmber di inisial T.M.E. di 45 aña di edat na Kaminda Lagun pa manehá bou di influensia di alkohòl. E sospechoso tabata enbolbí den un aksidente entre dos vehíkulo, di kua el a dal patras di un outo. E sospechoso tabata mustra diferente karakterístika di un persona ku tabata bou di influensia di alkohòl. Konforme e maneho di ‘botsen is blazen’ e agentenan a dun’é òrdu pa hasi un tèst di supla, pero e no tabata supla sufisiente den e aparato. A hib’é warda di polis i despues di un análisis di rosea, a konfiská su reibeweis.  

Bo a mira algu sospechoso? Yama 717 8000 òf e liña di tep anónimo 9310.

FUENTE:KPCN/LIVE99FM