Redakshon
Kralendijk,- Un biaha mas a keda demonstrá i konfirmá ku kaminda tin UNION e éksito ta garantisá. E organisashon a kana zetá, e eksperimentu di drive through a funshoná.
Bou di tènt tabatin un partispashon grandi di miembronan. Kolegio Ehekutivo tabata bon representá den gezaghèber John Soliano i diputadonan Abraham i den Heyer. Konseho Insular tambe a duna kara. Tur e diskursonan tabatin bon kontenido ku bon mensahe. Presidentenan di e sindikatonan presente tambe a duna nan mensahe bon kla na nan miembronan.
E parti sosial despues te na final a bai den bon ambiente ku diferente diskushon den grupo riba diferente tema i tur a bai ku e rèspèt pa otro su opinion. E úniko kritika konstruktivo ku mi tin ta ku mi a sinti falta di e partner mas importante di tur e sindikatonan presente, esta e dunadónan di trabou o aloménos nan organisashon madre Buisines Federation Bonaire ku kende regularmente nan ta na mesa. A bira un kustumber ku riba Dia di Labor ta invitá representantenan di dunadónan di trabou pa nan tambe partisipá i ta konsiente di e balor di tin un bon relashon entre Sindikato i Dunadó di trabou. Al fin al kabo ta e dos partidonan aki ta sera kontraktonan kolektivo ku otro pa loke ta kondishonnan laboral i sirkumstansianan laboral.
Na 2012 diputado di e tempu ei, Silvana a tira e hanskun òf por bisa bin e fiesta di trahadó ku e regalo pa lanta e plataforma tripartit, esta e plataforma ku awe nos konosé komo Diálogo Sentral ku tin representashon di gobièrnu, empresanan i sindikalismo konsehá pa ministerio di asuntunan sosial i di labor, miéntras ku Kámara di Komersio di Boneiru tambe ta miembro.
Un plataforma ku a proba su derecho di eksistensia i ku a kontribuí positivamente na desaroyo sosial-ekonómiko di Boneiru. E aña aki diputado Abraham a papia di Penshun General pa tur trahadó aki na Boneiru. Un tema ku por sierto den último elekshon a keda kargá pa tur partido politiko. Sr. Abraham a bisa ku di parti di gobièrnu nan ta kla i awor ta na e dos partrnernan esta USIBO den representashon di e klase trahadó i Buisines Federation Bonaire den representashon di e sektor di dunadó di trabou pa yega na un akuerdo.
Mi ta spera ku USIBO ta tuma e regalo aki na serio i ku e siman aki mes ta sali un invitashon pa e tres partnernan aki sinta huntu i kuminsá kònbersashonan ku e meta pa entrodusí Penshun General na Boneiru. E otro regalo na e fiesta di Dia di Labor ta esun di konsehal Daisy Coffie kende a bisa ku hasiendo uso di su derecho di tuma inisiativa pa un ordenansa di lei ta bai traha riba institushonalisá
Diálogo Sentral komo un órgano legal di konseho i konsulta riba nivel di Entidat Públiko. E regalo aki tambe sindikalismo mester kue tene duru pa aportá pa e bira realidat. Esei lo duna e plataforma aki un status hurídiko legal dentro di e sistema di gobernashon di nos isla i lo tin un karakter duradero.
Ademas e ta yuda gobièrnu den su afan pa duna partispashon real i demokrátiko na sektornan importante di nos komunidat ku ta e kargadónan di nos desaroyo sosial-ekonómiko, esta e invershonistanan i esnan ku ta duna labor.
E dinámika entre e dos sektornan aki lo ta e balansa pa un desaroyo sosial-ekonómiko duradero i balansá. Un desaroyo kaminda e dunadó di trabou ta haña su rekompensa di su invershon den forma di ganashi hustu i e trahadó ta haña su rekompensa di su invershon di labor, talento, dedikashon, motivashon i produkshon den forma di kondishonnan laboral hustu faborabel i ku lo kontribuí na hisa kalidat di dje i su famia.
Pues dos regalo ku por ta parti integral di e programa di USIBO pa aña 2025/2026 i ku e esfuerso pa dia 1 di mei 2026 ku orguyo por presentá e logronan aki pa e klase trahadó i su famia, esta Penshun General pa tur trahadó i un Diálogo Sentral ku un base legal komo un konseho sosial-ekonómiko di Entidat Públiko ankrá den un ordenansa di lei.
FUENTE: NÒCHI WILLEM/LIVE99FM
GIPHY App Key not set. Please check settings