DIA PROMÉ DI MEI ÚLTIMO E SINDIKATONAN UNÍ A SELEBRÁ DIA DI OBRERO.

Kralendijk,- Despues di 2 aña ku no a selebrá dia di obrero aki na Boneiru direktiva di  ABVO a logra uni e sindikatonan pa por a selebrá e dia memorabel aki i a parti un salú den forma di  un “Drive Thru” pa tur e miembronan ku ta afiliá na sindikato. E selebrashon tabata un éksito rotundo.

Direktiva di ABVO Bonaire kier a gradisí tur e miembronan di e 6 sindikatonan ku a uni pa selebrá e dia aki. Un danki fraternal ta bai na tur esnan ku a aseptá e invitashon i ku a  akudí na nos “Drive Thru ” uni nos ta vense”.

Mas a un nos ta sumamente gradesido na miembronan di kolegio ehekutivo i di konseho insular ku a presensia e selebrashon di dia di obrero. Presidente di direktiva ABVO Boneiru, sra. Tafila Janga, kier a para ketu na e mensahe ku diputado Nina den Heyer a menshoná den su diskurso:

“Responsabilidat no ta solamente di e lidernan di sindikato pero tambe di tur esnan ku ta miembro di e sindikato”. Ku mensahe aki direktiva di ABVO ta enfatisá ku miembronan tambe tin un ròl sumamente importante den proseso laboral na Boneiru. Es mas ta miembro ta forma sindikato.

Tambe por bisa ku tabatin hopi interes  pa e parti kaminda presentenan por a sosialisá ku otro.

Un biaha mas direktiva di ABVO ta sumamente agradesido pa e akohida  na e selebrashon di dia di obrero.

Esaki ta demostrá ku huntu nos por hasi muchu mas na bienestar di e klase trahadó.

FUENTE:ABVO BONEIRU/LIVE99FM