REGISTRASHON PA SITIO DI STENT.

Kralendijk, – Komishon Herensia Kultural Rincon ke informa pueblo di Boneiru ku registrashon di sitio di stent pa dia di Rincon lo habri awe, dia 26 di mart 6or di atardi.

Registrashon pa sitio di stent ta fasil:

1. Bai riba e pagina di internet ofisial di dia di Rincon: www.diadirincon.org
2. Bai na inskribi pa sitio
3. Hasi e mapa grandi pa bo por mira e sitionan. Kada area lo tin un nomber ku tambe lo ta indiká riba e mapa. Si bo skohe e produkto ku bo ke bende, bo por mira na unda esaki ta posibel.
4. Skohe bo sitio
5. Ora bo “click” un di e sitionan bo por registra bo mes. Korda yena informashon korekto i wak bon kiko ta nesesario.
6. Ora tur kos ta yena, bo petishon ta bini bek serka e komishon i nan lo revisa esaki.
7. Bo lo risibi un email ku tur e informashon ku bo mester i konfirmashon di bo registrashon.

E tema e aña aki pa dia di Rincon ta kunuku, pues pensa kon abo lo bai inkorpora esaki den bo stent pa Dia di Rincon.

Si tin kualke pregunta, sugerensia, of konseho, por manda esakinan libramente na e email ofisial di Komishon Herensia Kultural Rincon, info@diadirincon.org. Pa keda na altura di tur e desaroyonan en konekshon ku dia di Rincon por “like” i sigui e pagina di Facebook: Dia di Rincon Pagina Ofisial.

Dia 29 di mart lo tin e prome aktividat pa habri e temporada kultural, Sende Mecha, ku hisamentu di bandera pariba di misa pa despues topa e kuater skinanan na bustu di Broertje Janga, di 6or di atardi pa 9or di anochi.

Tur hende ta invita pa bini Rincon dia 30 di aprel, pa huntu nos disfruta di e kultura di Rincon. Dia 30 di aprel ta den Rincon bo mester ta!

FUENTE: KOMISHON HERENSIA KULTURAL RINCON/LIVE99FM