CURAÇAO – SINT MAARTEN: CBCS SPERANDO INTRODUKSHON DI FLORIN KARIBENSE KU KONFIANSA

WILLEMSTAD/PHILIPSBURG – Falta ménos ku un siman pa introdukshon di florin karibense (XCG) bira realidat. Djaluna 31 di mart 2025, Kòrsou i Sint Maarten lo yama nan unidat monetario nobo bonbiní. Centrale Bank van Curaçao en Sint Maarten (CBCS) ta sperando e transishon di florin di Antia Hulandes pa florin karibense ku antisipashon i konfiansa.

Periodo di transishon:

No ta mesora un i tur lo tin sufisiente florin karibense pa hasi tur nan transakshonnan kèsh. P’esei, di 31 di mart te ku 30 di yüni 2025 (e ‘periodo di sirkulashon pareu’), lo por usa tantu NAf komo Cg pa hasi pago kèsh. A pidi e negoshinan duna kliente sèn bèk na florin karibense. Pero na kuminsamentu, probablemente nan lo duna sèn bèk na NAf tambe, debí ku nan no tin sufisiente florin karibense ainda na nan disposishon.

Transakshon online, na ATM i ku tarheta débit i credit di Visa i Mastercard

E bankonan komersial ta hunga un ròl importante den e transishon akí. Den e temporada tras di lomba, nan a kolaborá intensamente ku CBCS pa adaptá e sistemanan di pago. Aunke florin karibense lo bira medio di pago legal for di 31 di mart, ta den e anochi di 31 di mart pa 1 di aprel benidero e pagonan lo kuminsá pasa na e unidat monetario nobo. Den práktiko, loke esei ta enserá ta ku e kódigo di valuta ANG den e sistemanan lo kambia bira XCG. A palabrá ku e bankonan ku dia 31 di mart, nan lo ta será pa públiko for di 12.00 or di mèrdia pa por hasi e preparativonan nesesario. Ademas, di 8.00 or di anochi te 8.00 or di mainta su manisé dia 1 di aprel, e sistema di online banking lo no ta kompletamente den servisio.

Fuera di esei, ora e sistemanan ta kambiando di ANG pa XCG, por tin momento ku lo no por lanta sèn na ATM. No por bisa di antemano kon largu e interupshonnan di servisio di online banking i e mashinnan di ATM lo dura. Esei ta dependé di kuantu e trabounan di transishon lo dura na kada banko. Ademas, pa tene kuenta ku logístika, lo suministrá biyete di florin karibense na e mashinnan di ATM gradualmente, den un periodo di no mas ku dos siman. P’esei, por sosodé ku dia 31 di mart, e dia ku florin karibense lo drenta den sirkulashon, i algun dia mas despues di esei, ainda e mashinnan di ATM lo saka biyete di NAf. Tambe, públiko mester tene kuenta ku rònt di mei anochi di 1 di aprel 2025, kisas lo no por hasi pago via kuenta (débit i krédit) di Visa i Mastercard. Esei lo varia di banko pa banko.

Troka NAf pa Cg

Entrante 1 di yüli 2025, NAf lo no ta un medio di pago legal mas. Esei ta nifiká ku, for di e fecha ei, lo no por paga ku NAf mas. Lo por troka NAf pa XCG sí ainda, di 31 di mart 2025 te ku 31 di mart 2055 (un periodo di 30 aña). Di 31 di mart 2025 te ku 31 di mart 2026, públiko lo por troka NAf kèsh pa XCG na e bankonan komersial, basta nan tin kuenta na e banko en kuestion. E bankonan komersial lo stimulá públiko pa depositá e sèn kèsh riba nan kuenta (en bes di pidi sèn kèsh bèk na XCG). E bankonan komersial mes lo kombertí e saldonan di kuenta di NAf pa XCG. Esnan ku no tin kuenta di banko por akudí na CBCS pa hasi esei.

Pa suma te ku NAf 2.500, no tin mester di sita si pa e promé biaha ku bin troka sèn. Pa troka sèn mas biaha i pa suma riba NAf 2.500, mester hasi un sita promé na https://www.centralbank.cw/exchange-request. Di 31 di mart 2026 te ku 31 di mart 2055 (29 aña), públiko lo por akudí na CBCS ainda pa troka NAf. Ta rekomendá públiko pa, durante e periodo di sirkulashon pareu, hasi pago mas tantu posibel ku sèn kèsh, ya ku asina lo tin ku troka ménos sèn na banko. Kódigo di valuta Den práktika, kada unidat monetario (valuta) tin un kódigo di valuta i un signo di valuta. Ta International Organization for Standardization (ISO) ta fiha e

kódigo di valuta.

Segun e reglanan di e organisashon akí, kódigo di valuta di un pais mester kuminsá ku e promé dos lèternan di e kódigo di pais, siguí pa un lèter ku ta indiká e unidat monetario. Ora ta mas ku un pais ta usa e unidat monetario, manera ta e kaso ku florin karibense, e reglanan di ISO ta bisa ku e kódigo di valuta mester kuminsá ku un ‘X’, siguí pa e dos lèternan ku ta identifiká e unidat monetario. Ta p’esei, florin karibense su kódigo di valuta ta ‘XCG’. Sin embargo, ta e pais mes ta disidí ki signo di valuta lo usa. Artíkulo 3 di Regeling Gemeenschappelijk Geldstelsel Curaçao en Sint Maarten ta bisa ku por usa ‘CMg’ komo signo di valuta. Pa e signo di valuta kuadra mihó ku e kódigo di valuta i pa evitá konfushon, CBCS a proponé na e ministernan di Finansa di ámbos Pais pa usa ‘Cg’. Aktualmente, CBCS ta den konsulta ku departamento di Legislashon i Asuntunan Hurídiko di ámbos Pais pa e abreviashon akí ser fihá den lei.

Kampaña informativo

Algun tempu pasá, CBCS a start un kampaña informativo tokante e karakterístikanan di outentisidat di e unidat monetario nobo i e periodo di transishon, pa públiko por ta bon prepará. Entre otro, a organisá seshon pa públiko i pa sektor empresarial i industrial, ku a tuma lugá na CBCS, na sierto negoshi i na sentro di bario. Tambe, a tene seshon online, entrevista na televishon i radio, i foyeto, ku a distribuí entre otro di kas pa kas. Fuera di esei, tur informashon ta disponibel tambe den e app My Caribbean Guilder (na hulandes, papiamentu i ingles) i riba e wèpsait www.caribbean[1]guilder.com. CBCS ta rekomendá pa akudí na e bankonan komersial pa haña e informashon di mas resien tokante orario di servisio di e sistemanan di pago den e dianan benidero. Pa pregunta adishonal, por tuma kontakto ku departamento di Corporate Communications na CBCS@centralbank.cw.

Willemstad, 25 di mart 2025

CENTRALE BANK VAN CURAÇAO EN SINT MAARTEN/LIVE99FM