CFT: “TIN PELIGER DI REKAIDA NA BONEIRU, MESTER PONE E BASE NA ÒRDU”

Kralendijk – Durante e deliberashonnan ku a tene ku Kolegio Ehekutivo i Konseho Insular di Boneiru, Kolegio di supervishon finansiero di Boneiru, Sint Eustatius i Saba (Cft) a pidi atenshon pa e problemanan ku frekuentemente ta keda reflehá den e hayasgonan di Cft.

Maneho finansiero, e polítika presupuestario i e funshonamentu di e entidatnan gubernamental ta kore peliger di rekaida, pa motibu di un falta di kapasidat di implementashon. Boneiru simplemente no ta in control.

Kapasidat di implementashon

Den tur e áreanan, Cft ta konstatá un falta di kapasidat di implementashon, loke ta varia di un falta di tumamentu di desishon pa e gobernashon insular te un falta di implementashon di esaki. Esaki ta keda reflehá den e rekaida di maneho finansiero, implementashon defisiente di maneho i funshonamentu insufisiente di entidatnan gubernamental.

Maneho finansiero

Den e añanan pasá, Boneiru a tuma pasonan importante pa mehorá maneho finansiero. Pa 2023, pa di dos biaha konsekutivo, Boneiru a risibí un deklarashon kompletamente aprobatorio di ouditor. Sinembargo, tin un rekaida. E aña pasá, Cft a ekspresá su mes di manera krítiko den su konsehonan, i a sinti e obligashon pa apstené di emití huisio tokante di e di kuater informe di implementashon di 2024, pa motibu di e suministro defisiente di informashon. Di e manera aki, ta limitá Konseho Insular den su tarea di supervishon. Konsiderando e hayasgonan aki, Kolegio Ehekutivo a invitá Cft pa – riba término kòrtiku – duna konsehonan mas detayá tokante di e strukturashon di maneho finansiero.

Implementashon presupuestario 2024 i konsekuensianan pa 2025

Cft a reiterá su preokupashonnan tokante di e faktibilidat di e ambishonnan presupuestario di Boneiru, i ta opservá un desaroyo preokupante respekto di rekursonan no gastá. Den un plaso di 5 aña, e presupuesto di Boneiru a ser redoblá, meskos ku e reservanan. E isla tin difikultat pa gasta e rekursonan, i tin hopi sèn di parker den reservanan aloká. Debí na esaki, ta aplasá pa añanan posterior e ambishonnan polítiko di 2024

.

Entidatnan gubernamental

Cft tambe a pidi atenshon pa corporate governance i e maneho di e entidatnan gubernamental. E funshonamentu di Selibon ta demostrá e urgensia di atendé ku e puntonan aki mas pronto posibel.

Kobro di impuestonan lokal

Finalmente, Cft a reiterá su opheshonnan kontra e intenshon di Boneiru pa tuma over e kobro di impuestonan lokal di Belastingdienst Caribisch Nederland. Esaki ta krea riesgonan konsiderabel pa e presupuesto di Boneiru. E organisashon atministrativo ya kaba ta bou di preshon debí na e retonan den e área di implementashon di polítika, maneho finansiero i entidatnan gubernamental. Komo reakshon, Kolegio Ehekutivo a indiká ku e lo laga den tur kaso e funshon di lokèt di e servisio di impuesto serka Belastingdienst Caribisch Nederland. Ademas, Boneiru lo priorisá pone na òrdu e atministrashon básiko di impuestonan.

FUENTE: CFT/LIVE99FM