KEN TA DOÑO DI TERENO??

Kralendijk,- Asuntu di tereno ku esnan liberá di sklabitut a haña den konseshon òf na hür despues di tempu a bira propiedat ta birando un trabou inmenso pa proba ken realmente ta doño.

Entre 1867 i 1894 a bende i duna den konseshon tantu tereno grandi komo tereno chikitu.

Na 1886 gobièrnu abase di Gouvernementsbesluit di 30 di yanüari 1886 a tuma e siguiente desishon. Esnan ku durante sinku aña konsekutivo a planta i mantené nan tereno den bon kondishon ta haña e tereno den propiedat sin gastu. Na 1894 a kuminsá usa e palabra hür na lugá di konseshon.

Na 1924 a introdusí un lei ku, entrante promé di yanüari 1925, tur tereno mas ku trinta aña duná na konseshon òf na hür ta bira propiedat.

E pregunta, kiko a bai robes ku despues di shen aña tin asina tantu diskushon. Den tur e distriktonan di Bonaire tin lista di e personanan ku a haña tereno na hür ku a bira propiedat.

Ta e asuntu di propiedat, ken ta yu legítimo òf yu adaptá, kon konstelashon di e famia ta, ken a i ta paga impuesto riba e tereno ta tresiendo inklaridat, desgustu i pleitu den seno familiar ku kasonan den korte. Den henter e asuntu aki tin gastu mará na momentu di buska informashon. Mester bini un klaridat kon henter e traspaso di tereno a tuma lugá pa trese pas den famianan. Kisas ta un bon tópiko pa promové ariba.   

FUENTE:ARTHUR SEALY/LIVE99FM