SIMAN DI MUZIEK PA MUCHA 2024 TA TERMINA KU UN TREMENDO SHOW

Djabièrnè 31 di mei último a tuma lugá e klousura di Siman di Muzik pa Mucha 2024. E evento aki a tuma lugá na Creative World kaminda e hóbennan di ACE Tweens huntu Bauco a pone un tremendo show pa un públiko priva di mas o ménos 50 persona ku akudí. E show titulá “Mi Kultura ta Uni-Ko” ta un wega di palabra ku ta pone bo pensa e motibunan pa kiko nos Kultura ta uni, i e ta uni kos. Esaki tambe tabata e tema pa Siman di Muzik pa Mucha 2024 i tambe tema di e albùm ku ACE Foundation a produsí den kolaborashon ku Xechel Jacobs tambe konosí komo Bauco i Xemio Jacobs ku a produsí Indjan Arowak.

E show a wòrdu traha kompletamente ku kantikanan original kanta pa Bauco, Melody Jacobs i Zhea Ayubi ku ta un di e integrantenan di ACE Tweens Club. Bou di direkshon di Zoe Bernardina, Damari Alonso Santos i Berti Kompru por a mira un show espektakular ku baile, kanto i drama ku sigur a kai na agrado di tur presente. Durante e show di mei ora por mira e hóben nan di ACE Tweens hunga algun ròl di entre otro Kultura i ta hiba públiko den un biahe kaminda ta bai deskubrí unda nos kultura a kuminsá i kiko tur ta parti di nos kultura. Esaki por medio di kantikanan manera Indjan Arowak, Kustumbernan di Mai i mas.

Despues di e show a duna rekonosementu na MCB Bonaire i Fundashon Wega di Number Boneiru ku a spònser Siman di Muzik pa Mucha 2024. Sr. Tambe a duna un rekonosementu spesial na lider di Formashon Musikal Krioyo sr. Padjua Celestijn pa su trabou inkansabel ku ela hasi ku FMK pa eduká mucha i hóbennan den e arte di músika. Algu ku sigur ta digno di atmirashon i meresé un rekonosementu. Direktor di ACE Foundation a yama danki na Live99 ku a laga ACE Foundation tuma over e orario di 5or pa 6or pa dediká esaki kompletamente na Siman di Muzik pa Mucha.

Na final tabata tin asina un dushi ambiente ku a ripití e show di Festival di Awa ku a tuma lugá e wikènt anterior pa e públiko presente. Esaki mirando ku na Boneiru sigur nos tin un kultura di awa. Nos ta isla di piskadó i nabegantenan, i awa a sòru pa nos kultura, e ta sòru pa konektá nos ku otro kulturanan tambe ku ta bin gosa di nos dushi bida marino i tambe nos dushi isla.

ACE Foundation ta yama danki na tur ku a hasi e proyekto aki posibel inkluyendo OLB, Fonds voor Cultuur Participatie, MCB, Fundashon Wega di Number Boneiru i e tim di ACE Foundation ku tin dia a traha dia i anochi oranan largu pa kumpli ku e bunita meta tras di Siman di Muzik pa Mucha.

Esaki ta kulminashon di kasi dos luna intenso di trabou kaminda a produsí un albùm ku 8 kantika, 2 videoklep i diferente presentashon durante siman di Muzik pa Mucha. Entre otro na Mangazina di Rei, Taste of Bonaire i algun skol básiko. Asina ki ACE Foundation ke kontribuí na kantikanan ku ta sano pa mucha i hende grandi tende. ACE Foundation ta spera ku esaki ta sirbi komo inspirashon pa otro artistanan tambe dediká un tiki tempu na krea kantikanan pa mucha.

E kantika, videoklep i e show kompletu ta disponibel pa mira riba nos kanal di Youtube ku ta ACE Foundation Bonaire.

FUENTE:ACE/LIVE99FM