SEGURIDAT DI KUMINDA TA KUESTION DI AKSHON AWOR!

Kralendijk,- Koalishon aktual den Konseho Insular a duna di konosé ku seguridat di kuminda ta un tópiko di prioridat pa nan. Mi ta sostené e posishon aki totalmente i ta kla pa yuda ku akshonnan konkreto. Seguridat di kuminda ta garantisá ku Boneiru mes, minimalmente, por sòru pa 50% di su nesesidat di kuminda. Aktualmente nos ta kore hopi atras pa logra e meta aki.

Akshonnan konkreto mester enserá, entre otro, privatisashon inmediato di LVV. LVV komo instituto pará riba su mes pia por traha hopi mas efektivo pa logra e meta ariba deskribí.

Ta imposibel ku tin diferente instituto fuerte ku gobièrnu a krea pa atende diferente tópiko, pero ku nos no ta dal e stap pa privatisá LVV. LVV, ku por bira e fundamentu esensial pa seguridat di kuminda, mester di un base profeshonal fuerte i sólido. For di e base aki, LVV por sera akuerdonan di koperashon fihó i duradero ku institutonan profeshonal di Hulanda riba e tereno di kuminda. Hulanda ta un di e paisnan mas prominente den ekspertisio di produkshon di kuminda, agrikultura, krío di bestia i piskamentu.

Aktualmente nos ta warda muchu riba Hulanda. Nos mester tuma inisiativanan mas konkreto pa organisá nos mes mihó den loke ta trata seguridat di kuminda. Di e forma aki, si nos tin un base profeshonal fuerte, e ayudo di gobièrnu sentral di Hulanda lo bira muchu mas efektivo.

Finalmente mi ta boga tambe pa nos krea un base finansiero sólido i struktural pa LVV nobo. Esaki ta posibel, por ehèmpel, si nos hasi uso di entradanan struktural di industria di turismo. Awor aki e lei nobo di impuesto di turismo ta dikta ku “entradanan lo wòrdu usá den nan gran mayoria pa turismo i piskamentu”. Por amplia e definishon bou di e parti di “piskamentu” den e lei aki i dikta ku e entradanan, fuera di loke ta bai pa turismo, lo bai pa “seguridat di kuminda, esta agrikultura, krío di bestia i piskamentu”.

Boluntat tin, pero awor ta akshon konkreto nos mester tuma.

FUENTE: JOLINDA CRAANE/LIVE99FM